ماسكەۋدە وتكەن «قازاقستان – مۇمكىندىكتەر ۆەكتورى» ىسكەرلىك ديالوگى بارىسىندا قر-نىڭ ينۆەستيسيالىق الەۋەتى تالقىلاندى. ءىس-شارادا ەكى ەلدىڭ ساياسي جانە ىسكەرلىك قوعامداستىقتارىنىڭ وكىلدەرى ءسوز سويلەدى.
ق ر رف-داعى ەلشىسى داۋرەن ابايەۆ جاھاندىق احۋالعا قاراماستان، مەملەكەتتەردىڭ ەكونوميكالىق ىنتىماقتاستىعى دامۋدىڭ جاڭا كەزەڭىن وتكەرىپ جاتقانىن ايتتى. سوڭعى 18 جىلدا قازاقستان ەاەو ەلدەرى اراسىندا رەسەيلىك ينۆەستيسيالاردى تارتۋ كولەمى بويىنشا كوشباسشى بولدى – بۇل كورسەتكىش $20 ملرد-تان استى.
«رەسەي، ارينە، قازاقستانداعى شەتەلدىك كاپيتالمەن جۇمىس ىستەيتىن كاسىپورىندار سانى بويىنشا كوشباسشى. بۇگىندە ەلىمىزدە رەسەيدىڭ قاتىسۋىمەن 28 مىڭنان استام كومپانيا جۇمىس ىستەيدى، ولاردىڭ 4 مىڭعا جۋىعى وتكەن جىلى اشىلدى. مۇنداي سەرپىنگە ونەركاسىپتىك كووپەراسيانىڭ ارقاسىندا قول جەتكىزىلدى»، – دەدى ديپلومات.
ىسكەرلىك كەزدەسۋگە قاتىسۋشىلار قازاقستان مەن رەسەيدىڭ بىرلەسكەن جوبالارىن، سونداي-اق ولاردى جۇزەگە اسىرۋدىڭ ەكونوميكالىق جانە الەۋمەتتىك اسەرىن تالقىلادى.
«بىرلەسكەن جوبالاردىڭ جالپى سانى شامامەن 135. ولاردىڭ جالپى قۇنى $26،2 ملرد-تان اسادى. بۇل جوبالاردىڭ ارقاسىندا 28 مىڭ جۇمىس ورنى اشىلادى»، - دەدى «Kazakh Invest» ۇك» اق باسقارما ءتوراعاسى ەرجان ەلەكەيەۆ.
ونىڭ ايتۋىنشا، قازىرگى ۋاقىتتا ماشينا جاساۋ، مەتاللۋرگيا جانە حيميا ونەركاسىبى سالاسىندا ىنتىماقتاستىق ەرەكشە قارقىنمەن دامىپ جاتىر. بۇعان مەملەكەت تاراپىنان ەلدەگى ينۆەستيسيالىق احۋالدى جاقسارتۋ ماقساتىندا بۇرىن قابىلدانعان شارالار ىقپال ەتكەن.
ەڭ ماڭىزدى جوبالارعا شولۋ جاساعان ەلەكەيەۆ قاراعاندى وبلىسىندا «تاتنەفت» كومپانياسىمەن $274 ملن-عا اۆتوموبيل شينالارىن ءوندىرۋ، قوستاناي وبلىسىندا Kamlitkz كومپانياسىمەن $485 ملن-عا جۇك كولىكتەرى ءۇشىن شويىن قۇيۋ كومپونەنتتەرىن ءوندىرۋ، تۇركىستان وبلىسىندا $1،7 ملرد-قا جىلىجاي قىزاناقتارىن ءوسىرۋ جانە جامبىل وبلىسىندا «ەۆروحيم» كومپانياسىمەن $1 ملرد-قا مينەرالدى تىڭايتقىش وندىرەتىن جوبالارىن اتاپ ءوتتى.
ايتا كەتۋ كەرەك، سوڭعى ەكى ينۆەستيسيالىق جوبا ق ر اوك-نىڭ جالپى ءونىم مەن اۋىل شارۋاشىلىعى ونىمدەرىنىڭ ەكسپورتىن 2028 جىلعا دەيىن ەكى ەسەگە ارتتىرۋ جوسپارىن جۇزەگە اسىرۋدا ستراتەگيالىق ماڭىزعا يە.
«قازاقستان ەكونوميكاسى ۇلكەن الەۋەتكە يە. ساراپشىلاردىڭ باعالاۋىنشا، بۇگىندە ەلدەگى ەگىستىك جەرلەردىڭ 30%-ى عانا تىڭايتىلادى. بۇل سالاداعى جاعدايدى وزگەرتۋ استىق ءتۇسىمىن 10%-عا ارتتىرۋعا مۇمكىندىك بەرەدى، ال ول رەسپۋبليكا كولەمىندە وراسان زور كورسەتكىش»، – دەدى «ەۆروحيم» توبىنىڭ پرەزيدەنتى ولەگ شيريايەۆ
جامبىل وبلىسىنداعى جاڭا زاۋىتتىڭ مينەرالدى تىڭايتقىشتارى مەن يندۋستريالىق ونىمدەرىنىڭ جىلدىق كولەمى 1 ملن توننادان اسادى دەپ كۇتىلىپ وتىر.
