الماتىدا "تازا قازاقستان" جالپىرەسپۋبليكالىق باعدارلاماسى جانە "الماتى – ءبىزدىڭ ورتاق ءۇيىمىز" قالالىق ناۋقانى اياسىندا قالا تۇرعىندارى اراسىندا ەكولوگيالىق مادەنيەتتى ارتتىرۋعا باعىتتالعان "جارقىن كۇز" ناۋقانى باستالادى. الداعى كۇندەرى قالانى كۇزگى-قىسقى كەزەڭگە دايىنداۋعا ەرەكشە نازار اۋدارىلادى، دەپ حابارلايدى Dalanews.kz.
18-24 قازان ارالىعىندا الماتىدا قالا كوشەلەرىندە، اۋلالاردا، قوعامدىق كەڭىستىكتەردە جانە جول ينفراقۇرىلىمىنىڭ بويىندا اعاشتاردى سانيتارلىق وڭدەۋ، قۇلاعان جاپىراقتار مەن قوقىستاردى جيناۋ بويىنشا اۋقىمدى جۇمىستار جوسپارلانعان. سونداي-اق، كىشى الماتى، ەسەنتاي، ۇلكەن الماتى، قارعالى، بورالداي، جاربۇلاق، تىكساي جانە ۇلكەن الماتى كانالى سىندى وزەندەر مەن سۋلاردىڭ جاعالاۋلارىن قوقىستان تازارتۋ جوسپارلانۋدا.
قالالىق كوممۋنالدىق قىزمەتتەر مەن مەردىگەرلىك ۇيىمدار جالپى ۇزىندىعى 1 525 كم ارىق جەلىلەرىن تازارتۋ بويىنشا جۇمىستى كۇشەيتەدى، بۇل ارىقتاردىڭ بىتەلىپ قالۋىنىڭ الدىن الۋعا جانە جاڭبىر سۋىن ءتيىمدى بۇرۋعا ىقپال ەتەدى. تازالاۋ پروسەسىنە 1 مىڭنان استام ارنايى تەحنيكا مەن 1،4 مىڭ جول جۇمىسشىسى تارتىلاتىن بولادى، ولار 5 مىڭنان استام اۋلا ۋچاسكەلەرىن، ءجۇرۋ بولىكتەرى مەن تروتۋارلاردى رەتكە كەلتىرەدى.
ايتا كەتەيىك، قورشاعان ورتانى قالدىقتارمەن، سونىڭ ىشىندە قاتتى تۇرمىستىق قالدىقتارمەن لاستاۋ ماسەلەسى مەگاپوليس ءۇشىن وزەكتى بولىپ قالا بەرەدى. تەك ارىق جەلىلەرىنەن كوممۋنالدىق قىزمەت قىزمەتكەرلەرى كۇن سايىن 250 م3 قوقىس جينايدى.
قالا تۇرعىندارىنىڭ قاۋىپسىزدىگىن قامتاماسىز ەتۋ جانە اعاشتار مەن ۇلكەن بۇتاقتاردىڭ قۇلاۋ ءقاۋپىن ازايتۋ ماقساتىندا 3،7 مىڭ اعاشتى سانيتارلىق كەسۋ جۇرگىزىلەدى، سونداي-اق 460 اپاتتى اعاش الىنىپ تاستالادى.
سونىمەن قاتار ناۋقان بارىسىندا 1 454 كونتەينەرلىك الاڭدى سانيتارلىق وڭدەۋ جانە 32 مىڭنان استام كوشە جانە اۋلا ۋرنالارىن تازالاۋ جۇرگىزىلەدى. قاجەت بولعان جاعدايدا كونتەينەرلەر جوندەلەدى جانە سىرلانادى.
ەستەرىڭىزگە سالا كەتەيىك، "الماتى – ءبىزدىڭ ورتاق ءۇيىمىز" ناۋقانى قالالىق ينفراقۇرىلىمعا دەگەن قامقورلىقتى دامىتۋعا جانە قالا تۇرعىندارى اراسىندا جاڭا ەكولوگيالىق مادەنيەتتى قالىپتاستىرۋعا باعىتتالعان.
