تۇركىستان قالاسىندا 25 قازان – رەسپۋبليكا كۇنى قارساڭىندا 2000 ورىنعا ەسەپتەلگەن العاشقى جايلى مەكتەپ اشىلدى. ەل پرەزيدەنتى قاسىم-جومارت توقايەۆتىڭ تاپسىرماسىمەن جانە قولداۋىمەن سالىنعان ءبىلىم ۇياسىنىڭ اشىلۋ سالتاناتىنا تۇركىستان وبلىسىنىڭ اكىمى دارحان ساتىبالدى مەن ءبىلىم سالاسىنىڭ ارداگەرلەرى قاتىستى،دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– مەملەكەت باسشىسىنىڭ باستاماسىمەن بۇگىنگى تاڭدا ەلىمىزدە «جايلى مەكتەپ» ۇلتتىق جوباسى قابىلدانىپ، زاماناۋي، وزىق ۇلگىدەگى ءبىلىم وشاقتارى سالىنۋدا. بۇل باستاما اپاتتى جانە ءۇش اۋىسىمدىق مەكتەپتەر ماسەلەسىن شەشىپ، وقۋشى ورىندارىنىڭ تاپشىلىعىن جويادى. بيىل وبلىسىمىزدا جالپى قۋاتتىلىعى 17 800 ورىندى قۇرايتىن 29 جايلى مەكتەپتىڭ قۇرىلىسى جۇرگىزىلۋدە. بۇگىن ونىڭ العاشقىسىن اشقالى وتىرمىز. سىزدەردىڭ مەكتەپتەرىڭىز جاي عانا جاڭا عيمارات ەمەس. بۇل – دامۋ مەن وقۋ ءۇشىن تاماشا جاعدايلار جاسالعان ورىن. ەلىمىزدىڭ بولاشاعى – ءبىلىمدى ۇرپاقتىڭ قولىندا. ولاردىڭ وقۋدا وزات بولىپ، قوعامنىڭ بارلىق سالاسىندا بيىك بەلەستەردى باعىندىرۋىنا تىلەكتەسپىن. جاڭا ءبىلىم ورداسىنىڭ اشىلۋى قۇتتى بولسىن! – دەدى دارحان ساتىبالدى.
مەملەكەت تاراپىنان ساپالى ءبىلىم الۋعا بارلىق جاعدايلار جاسالۋدا. ونىڭ ىشىندە تۇركىستان وڭىرىندە اۋقىمدى جۇمىس ءجۇرىپ جاتىر. بۇگىن تاپسىرىلعان الىپ ءبىلىم ۇياسى قالاداعى 2 مەكتەپتەگى جۇكتەمەنى ازايتۋعا مۇمكىندىك بەرەدى. ءبىرىنشى كەزەكتە مۇندا №28 مەكتەپ-ليسەيىنىڭ وقۋشىلارى كوشىپ كەلدى. قازىرگى تاڭدا 66 پەداگوگ اۋىسۋ تارتىبىمەن، 7 پەداگوگ كونكۋرستىق تارتىپپەن قابىلداندى. وقۋشى سانىنىڭ تولىعۋىنا قاراي وزگە دە ۇستازدار كونكۋرستىق راسىممەن قابىلدانادى. بىلىكتى ۇستازدار ارنايى ىرىكتەلگەن. بۇدان بولەك، قارجى، شارۋاشىلىق قىزمەتكەرلەرى جۇمىسقا الىنعان.
تۇركىستان قالاسىنىڭ جاڭا قالا اۋماعىندا سالىنعان 4 قاباتتى ءبىلىم ورداسىنداعى فيزيكا، حيميا، بيولوگيا جانە روبوتوتەحنيكا كابينەتتەرى زاماناۋي جابدىقتارمەن جابدىقتالعان. ءبىلىم الۋشىلاردىڭ جان-جاقتى دامۋى ءۇشىن مەكتەپتە سپورت زالدارى، شەبەرلىك زالدارى، زەرتحانالار مەن دەمالىس ايماقتارى ۇيىمداستىرىلعان. جوعارى جىلدامدىقتاعى ينتەرنەتكە قوسىلعان. باستاۋىش پەن جوعارى سىنىپ وقۋشىلارى جەكەلەگەن بلوكتاردا وقيدى. بالالاردىڭ جاس ەرەكشەلىگىنە وراي بلوكتاردىڭ ءارقايسىسى وقۋ سىنىپتارىمەن، سانيتارلىق توراپتارمەن، سپورت زالدارىمەن جانە جەكەشەلەگەن كىشكەنە شكافتارمەن قامتىلعان. ەرەكشە قاجەتتىلىگى بار بالالار ءۇشىن ينكليۋزيۆتى كابينەتتەر، پاندۋستار، جەدەل ساتىلار، ارنايى بەيىمدەلگەن اجەتحانالار سالىنعان.
تۇركىستان وڭىرىندە ءبىلىم سالاسىنا ەرەكشە كوڭىل ءبولىنىپ كەلەدى. وقۋ-تاربيە جۇمىستارىنا قولايلى جاعداي جاساۋ ماقساتىندا وبلىس باسشىلىعى بارلىق قاجەتتى شارالاردى قابىلداۋدا. سونىڭ ىشىندە ءبىلىم وشاقتارىنىڭ اۋماعى مەن عيمارات ىشىندە وقۋشىلاردىڭ قاۋىپسىزدىگىن تولىقتاي قامتاماسىز ەتۋ باستى مىندەتتەر قاتارىندا. بيىلعى جىلدىڭ وزىندە مەكتەپتەر بەينەباقىلاۋ، دابىل جۇيەلەرىمەن قامتىلىپ، پوليسيانىڭ جەدەل باسقارۋ ورتالىعىمەن ينتەگراسيالاندى.
ايتا كەتەيىك، پرەزيدەنتتىڭ تىكەلەي تاپسىرماسىمەن جۇزەگە اسىپ جاتقان «جايلى مەكتەپ» ۇلتتىق جوباسى اياسىندا تۇركىستان وبلىسىندا 29 مەكتەپ سالىنۋدا. وعان قوسا وبلىستىق بيۋدجەتتەن جانە ارنايى قوردىڭ قارجى كوزدەرىنەن 20 مەكتەپ پەن 1 مۋزىكالىق مەكتەپ بوي كوتەرۋدە. ونىڭ ىشىندە تورتەۋى ەل يگىلىگىنە تاپسىرىلىپ ۇلگەردى. قالعان مەكتەپتەردىڭ قۇرىلىسى ءجۇرىپ جاتىر. جالپى 14 ءبىلىم نىسانى بيىل تاپسىرىلسا، 7 مەكتەپتىڭ قۇرىلىسى كەلەسى جىلعا وتپەلى. ءتۇررلى جوبالار مەن قارجىلاندىرۋ كوزدەرى ەسەبىنەن ەكى جىلدا 50 ءبىلىم نىسانى پايدالانۋعا بەرىلگەندە وڭىردەگى اپاتتى جانە ءۇش اۋىسىمدى مەكتەپتەر ماسەلەسى تولىق شەشىمىن تاپپاق.
