تۋريزم جانە سپورت ۆيسە-مينيسترى سەرىك جاراسبايەۆتىڭ ايتۋىنشا، ءماجىلىس قاراۋىندا جاتقان سپورت تۋرالى زاڭ جوباسىنا تەرروريزم مەن ەكترەميزمگە قارسى نورمالار ەنگىزىلگەن،- دەپ حابارلايدى Dalanews.kz Ulysmedia.kz-كە سىلتەپ.
اتالعان ماسەلە ماجىلىستە سپورت ماسەلەسى تالقىلعان كەزدە كوتەرىلدى. دەپۋتات جيگۋلي دايرابايەۆ كەيبىر سپورتشىلاردىڭ ساقالىنىڭ ءوسىپ كەتكەنىن سىنعا العان. ول دىنگە بەرىلسە، «ولار مەشىتكە بارىپ ناماز وقىسىن» دەپ تە وتكىر ايتتى.
ونىڭ بۇل سىنىنا سەرىك جاراسبايەۆ جاۋاپ بەردى.
«قازىرگى تاڭدا كوپتەگەن سپورت تۇرلەرىندە ءوزىڭىز ايتىپ وتىرعانداي، ءدىننىڭ قاتە اعىمىنا كەتىپ قالعان سپورتشىلارىمىز بار، وكىنىشكە قاراي. ونى بىلەمىز، ءتىزىمى بار. سپورت تۋرالى زاڭ جوباسىنا تەرروريزم مەن ەكترەميزمگە قارسى نورمالاردى ەنگىزىپ وتىرمىز. ونى دەپۋتاتتار قولدادى»، - دەدى جاراسبايەۆ.
قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى بۇعان دەيىن اتىراۋدا وتكەن عىلىمي كونفەرەنسيادا قازاقتىڭ ءداستۇرىن جوققا شىعارىپ، ەل ىشىنە ىلاڭ سالىپ جۇرگەندەر بار ەكەنىن ايتقان ەدى. ونىڭ سوزىنشە، ەكسترەميزمنىڭ الدىن الۋ ءۇشىن ۇلتتىق ءسالت-داستۇردى، دۇرىس شاريعاتتى دارىپتەۋ قاجەت. “ءداستۇر دەگەنىمىز – ەلىمىزدە قالىپتاسقان ءدىني تاجىريبەلەر تىزبەگى جانە ءبىزدىڭ ءومىر ءسۇرۋ سالتىمىز. بۇگىندە قازاقتىڭ ءداستۇرىن جوققا شىعارىپ، ەل ىشىنە ىلاڭ سالىپ جۇرگەندەر جوق ەمەس” دەيدى ول. "قازاق ءدىنسىز بولعان" دەگەن سىندى شالا تۇسىنىكتەگىلەر ەلىمىزدى يسلام دىنىنە ەندى ءتاي-تاي باسقان بالاداي كورسەتكىسى كەلەتىنىن اتاپ وتەدى. ناۋرىزباي تاعان ۇلىنىڭ ايتۋىنشا، جات اعىمداردىڭ قاراجات تابۋ، بيلىككە بارۋ سىندى كوزدەگەن ماقساتتارى بولادى.
قوعام بەلسەندىسى، باسپاگەر شىڭعىس مۇقان "ساقال قويعان" سپورتشىلاردى سىناپ، قوعامعا ۇندەۋ تاستاعان بولاتىن. "پۋبليكاعا الىپ شىعاتىن ادامداردىڭ، ەلدىڭ اتىنان جارىسقا قاتىساتىنداردىڭ ءجۇرىس-تۇرىسى مەن ءۇستى-باسىنا ءمان بەرگەنى ءجون" دەپ جازادى ول.
