Týrizm jáne sport vitse-ministri Serik Jarasbaevtyń aitýynsha, Májilis qaraýynda jatqan Sport týraly zań jobasyna terrorizm men ektremizmge qarsy normalar engizilgen,- dep habarlaidy Dalanews.kz Ulysmedia.kz-ke siltep.
Atalǵan másele Májiliste sport máselesi talqylǵan kezde kóterildi. Depýtat Jigýli Dairabaev keibir sportshylardyń saqalynyń ósip ketkenin synǵa alǵan. Ol dinge berilse, «olar meshitke baryp namaz oqysyn» dep te ótkir aitty.
Onyń bul synyna Serik Jarasbaev jaýap berdi.
«Qazirgi tańda kóptegen sport túrlerinde ózińiz aityp otyrǵandai, dinniń qate aǵymyna ketip qalǵan sportshylarymyz bar, ókinishke qarai. Ony bilemiz, tizimi bar. Sport týraly zań jobasyna terrorizm men ektremizmge qarsy normalardy engizip otyrmyz. Ony depýtattar qoldady», - dedi Jarasbaev.
Qazaqstan musylmandary dini basqarmasynyń tóraǵasy, bas múfti Naýryzbai qajy Taǵanuly buǵan deiin Atyraýda ótken ǵylymi konferentsiiada qazaqtyń dástúrin joqqa shyǵaryp, el ishine ylań salyp júrgender bar ekenin aitqan edi. Onyń sózinshe, ekstremizmniń aldyn alý úshin ulttyq salt-dástúrdi, durys shariǵatty dáripteý qajet. “Dástúr degenimiz – elimizde qalyptasqan dini tájiribeler tizbegi jáne bizdiń ómir súrý saltymyz. Búginde qazaqtyń dástúrin joqqa shyǵaryp, el ishine ylań salyp júrgender joq emes” deidi ol. "Qazaq dinsiz bolǵan" degen syndy shala túsiniktegiler elimizdi Islam dinine endi tái-tái basqan baladai kórsetkisi keletinin atap ótedi. Naýryzbai Taǵanulynyń aitýynsha, jat aǵymdardyń qarajat tabý, bilikke barý syndy kózdegen maqsattary bolady.
Qoǵam belsendisi, baspager Shyńǵys Muqan "saqal qoiǵan" sportshylardy synap, qoǵamǵa úndeý tastaǵan bolatyn. "Pýblikaǵa alyp shyǵatyn adamdardyń, eldiń atynan jarysqa qatysatyndardyń júris-turysy men ústi-basyna mán bergeni jón" dep jazady ol.
