وسكەمەن قالاسىندا س.امانجولوۆ اتىنداعى شىعىس قازاقستان ۋنيۆەرسيتەتىندە قازاقستان رەسپۋبليكاسى پرەزيدەنتىنىڭ جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسى پرەزيديۋمىنىڭ كوشپەلى وتىرىسى ءوتتى. ايتۋلى شارادا وڭىرلىك عىلىمدى دامىتۋدىڭ وزەكتى ماسەلەلەرى مەن ونىڭ الەۋمەتتىك-ەكونوميكالىق دامۋداعى ءرولى تالقىلاندى.
وتىرىسقا شىعىس قازاقستان، اباي وبلىستارىنىڭ اكىم ورىنباسارلارى، پاۆلودار وبلىسى اكىمدىگىنىڭ باسقارما باسشىسى، ق ر پارلامەنت ءماجىلىسىنىڭ دەپۋتاتتارى، ق ر پرەزيدەنتىنىڭ جانىنداعى ق ر ۇعا اكادەميكتەرى، «ۇلتتىق اگرارلىق ءعىلىمي-بىلىم بەرۋ ورتالىعى» كەاق، «عىلىم قورى» اق، «كازسينك» ج ش س، «ءۇلبى مەتاللۋرگيالىق زاۋىتى»، «وسكەمەن ارماتۋرالىق زاۋىتى» اق، «ق ر ۇلتتىق يادرولىق ورتالىعى» رمك، «وسكەمەن تيتان-ماگنيي كومبيناتى» اق، «يادرولىق تەحنولوگيالار پاركى» اق، «PlasmaScience» ج ش س، جوو جانە عىلىمي مەكەمەلەردىڭ، وڭىرلىك بيزنەس سۋبەكتىلەرى مەن يندۋستريانىڭ ءبىرىنشى باسشىلارى، ءوڭىردىڭ جەتەكشى عالىمدارى، سونداي-اق ب ا ق وكىلدەرى قاتىستى. قاتىسۋشىلار وڭىردەگى عىلىمنىڭ دامۋ پەرسپەكتيۆالارىن، ونەركاسىپ پەن الەۋمەتتىك سالالارمەن ينتەگراسياسىن تالقىلادى.
وتىرىستىڭ اشىلۋ سالتاناتىندا ءسوز سويلەگەن ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ وڭىرلىك عىلىم – ايماقتىڭ تۇراقتى يننوۆاسيالىق دامۋىنىڭ نەگىزى ەكەندىگىن اتاپ ءوتتى جانە قازاقستانداعى عىلىمدى دامىتۋعا مەملەكەت باسشىسى ق.ق. توقايەۆتىڭ قولداۋىمەن ۇلكەن كوڭىل ءبولىنىپ جاتقانىنا نازار اۋداردى.
ءوز سوزىندە سپيكەر عىلىمنىڭ پراكتيكالىق ماڭىزىن ارتتىرۋ، ونى قوعام مەن ەكونوميكانىڭ وزىق دامۋىن قامتاماسىز ەتەتىن ناقتى ەكونوميكالىق رەسۋرسقا اينالدىرۋ ءۇشىن عىلىمي زەرتتەۋلەردى ۇيىمداستىرۋدىڭ زاماناۋي جۇيەسىن قۇرۋ كەرەكتىگىن ايتتى. بۇل تۇرعىدان العاندا، وڭىرلىك عىلىمدى دامىتۋ - يننوۆاسيالاردى ىلگەرىلەتۋدىڭ، ەكونوميكانىڭ ناقتى سەكتورى مەن عىلىمنىڭ بايلانىسىن نىعايتۋدىڭ نەگىزگى فاكتورى ەكەندىگىنە توقتالدى.
«دامىعان ەلدەردىڭ تاجىريبەسى قازىرگى تاڭدا جاھاندىق پروبلەمالاردىڭ نەعۇرلىم تۇراقتى ەكونوميكا مەن قوعامدى قۇرۋدا جەكەلەي ءارى ماقساتتى تاسىلمەن سيپاتتالاتىن جەرگىلىكتى كونتەكستكە اۋىسقانىن كورسەتىپ وتىر. وسىعان سايكەس، بۇل ماقساتقا قول جەتكىزۋ قۇرالى رەتىندە وڭىرلىك يننوۆاسيالىق ەكوجۇيەلەر (ءويج) تۇجىرىمداماسى بەلسەندى دامىپ كەلەدى، بۇل تۇجىرىمداما مەملەكەتتىك جانە جەكە سەكتورلاردىڭ ءارتۇرلى سۋبەكتىلەرىن ورتاق مىندەتتەر مەن ماقساتتار توڭىرەگىنە بىرىكتىرەدى، عىلىم جۇيەسىن ازاماتتاردىڭ ءومىرىن جاقسارتاتىن، باسەكەگە قابىلەتتىلىكتى ارتتىراتىن جانە ءوسۋدى ىنتالاندىراتىن يننوۆاسياعا اينالدىرۋعا ىقپال ەتەدى. وڭىرلىك يننوۆاسيالىق ەكوجۇيەلەردىڭ وزەگى - وڭىرلىك عىلىم. وكىنىشكە قاراي، قازاقستاندا وڭىرلىك عىلىمنىڭ جاعدايى ءالى دە بولسا تومەنگى دەڭگەيدە»، دەدى ا.كۇرىشبايەۆ.
سونىمەن قاتار، وڭىرلىك عىلىم ەڭ الدىمەن وبلىستىڭ ەكونوميكاسىن دامىتۋ ماسەلەلەرىن شەشۋگە، جوعارى تەحنولوگيالىق شەشىمدەردى ءدال وسى ايماقتارعا ەنگىزۋگە باعىتتالۋى ءتيىس ەكەندىگىنە ءمان بەرىلدى.
«سوندىقتان ۇلتتىق عىلىم اكادەمياسى بنق (پسف) جانە مەگا گرانتتار ءۇشىن ناقتى باسىمدىقتاردى بەلگىلەۋ جانە تاقىرىپتاردى ايقىنداۋ مىندەتىن العا قويىپ وتىر، ولار ەڭ الدىمەن، بولاشاقتىڭ سىن-تەگەۋرىندەرىن، ءوڭىردىڭ جانە سالانىڭ مىندەتتەرىن شەشۋگە باعىتتالۋى ءتيىس. قازىرگى ۋاقىتتا ءبىز 6 باسىم باعىت بويىنشا عىلىمي زەرتتەۋلەر جۇرگىزۋدىڭ 200 پەرسپەكتيۆالىق تاقىرىبىن ايقىندادىق جانە وڭىرلەردە، «اتامەكەن» ۇكپ، سالالىق مينيسترلىكتەرمەن تالقىلاۋلار جۇرگىزۋدەمىز»، دەپ اتاپ ءوتتى ا.كۇرىشبايەۆ.
شىعىس قازاقستان وبلىسى اكىمىنىڭ ورىنباسارى ە. نۇرعالييەۆ ءوز سوزىندە ايماقتار ۇلتتىق پروگرەستىڭ نەگىزى ەكەنىن جانە ەرتەڭگى كۇننىڭ مىندەتتەرىن شەشۋ ءۇشىن ولاردىڭ يننوۆاسيالىق الەۋەتىن پايدالانۋ قاجەتتىگىن اتاپ ءوتتى. ول عالىمدار مەن بيزنەس وكىلدەرى اراسىنداعى ءوزارا بايلانىستى نىعايتىپ، وڭىرلىك كاسىپورىنداردا ازىرلەمەلەردى ءىس جۇزىندە ەنگىزۋدىڭ ماڭىزدىلىعىنا توقتالدى.
اباي وبلىسى اكىمىنىڭ ورىنباسارى ج. سارسەبايەۆ ءوز بايانداماسىندا ايماقتىق عىلىمنىڭ ءوڭىردىڭ تۇراقتى دامۋىنا قوساتىن ماڭىزدى ۇلەسىن اتاپ ءوتىپ، ەكونوميكالىق جانە الەۋمەتتىك ماسەلەلەردى شەشۋدە تاۋ-كەن ونەركاسىبى، اۋىل شارۋاشىلىعى، ەكولوگيا جانە IT-تەحنولوگيالار سالالارىنداعى يننوۆاسيالاردى ەنگىزۋدىڭ ماڭىزدىلىعىن اتاپ كورسەتتى.
«اتىراۋ ۋنيۆەرسيتەتى» كەاق ديرەكتورلار كەڭەسىنىڭ ءتوراعاسى، فيلولوگيا عىلىمدارىنىڭ دوكتورى، پروفەسسور مامرايەۆ بەيبىت بايماعامبەت ۇلى ءوز بايانداماسىندا «اكىمدىك – عىلىم – بيزنەس» فورمۋلاسىنىڭ ءالى دە ءتيىمدى جۇزەگە اسپاي جاتقانىن اتاپ ءوتتى. ونىڭ باستى سەبەپتەرى رەتىندە عىلىمدى قارجىلاندىرۋدىڭ جەتكىلىكسىزدىگى مەن بولىنگەن قاراجاتتىڭ ءتيىمسىز پايدالانىلۋىن اتادى. وسىعان بايلانىستى، ول الداعى جىلدا فورسايت بولجام جاساپ، ونىڭ ناقتى ىسكە اسىرۋ جوسپارىن انىقتاۋدى ۇسىندى جانە ەلدىڭ شىعىسىندا ۇعا فيليالىن اشۋ وسى باستامالاردىڭ ءساتتى جۇزەگە اسۋىنا ىقپال ەتۋى مۇمكىن ەكەنىن اتاپ ءوتتى.
وتىرىس اياسىندا «گەولوگيا، مينەرالدى جانە كومىرسۋتەك شيكىزاتىن ءوندىرۋ جانە وڭدەۋ، جاڭا ماتەريالدار، تەحنولوگيالار» جانە «سۋ رەسۋرستارىن، جانۋارلار مەن وسىمدىك الەمىن، ەكولوگيانى ءتيىمدى پايدالانۋ» باعىتتارى بويىنشا بولجامنىڭ ارالىق ناتيجەلەرىن تالقىلاۋ فورسايت سەسسياسىندا عالىمدار وزدەرىنىڭ زەرتتەۋلەرى مەن ازىرلەمەلەرىن ۇسىندى. «عىلىم-بيزنەس» فورماتىنداعى سەسسيادا كوممەرسياليزاسياعا دايىن بولاشاقتى جوبالارىن ۇسىندى. قاتىسۋشىلار عىلىمي قاۋىمداستىق پەن بيزنەس اراسىنداعى ىنتىماقتاستىقتىڭ مۇمكىندىكتەرى تالقىعا سالىندى.
وتىرىستا عالىمدار، مەملەكەتتىك مەكەمەلەردىڭ وكىلدەرى، بيزنەس جانە قوعام وكىلدەرى اراسىنداعى ديالوگ ورناپ، قاتىسۋشىلار ءوزارا تاجىريبە الماسىپ، يدەيالارمەن ءبولىسىپ، قازاقستانداعى ايماقتىق عىلىمدى دامىتۋ ءۇشىن بىرلەسكەن شەشىمدەر ازىرلەدى.
كوشپەلى وتىرىس اياسىندا ءوڭىردىڭ ونەركاسىپتىك كاسىپورىندارىمەن ىنتىماقتاستىق تۋرالى 4 مەموراندۋمعا قول قويىلىپ، وتىرىس ناتيجەسى بويىنشا وڭىرلىك عىلىمدى دامىتۋدى شەشۋگە باعىتتالعان قارار قابىلداندى.
د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىندە ق ر پرەزيدەنتىنىڭ جانىنداعى ق ر ۇلتتىق عىلىم اكادەمياسىنىڭ وسكەمەن قالاسىنداعى فيليالى، س.امانجولوۆ اتىنداعى شىعىس قازاقستان ۋنيۆەرسيتەتىندە ق ر پرەزيدەنتىنىڭ جانىنداعى ق ر ۇلتتىق عىلىم اكادەمياسىنىڭ وڭىرلىك فورسايت ورتالىعى سالتاناتتى تۇردە اشىلدى.
