پرەمەر-مينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ سەنات پارلامەنتىنىڭ دالىزىندە مەملەكەتتىك قارىز كولەمى تۋرالى جۋرناليستەر سۇراعىنا جاۋاپ بەردى. ۆيسە-پرەمەر ءوز سوزىندە حالىقارالىق ۆاليۋتا قورى، دۇنيەجۇزىلىك بانك جانە حالىقارالىق رەيتينگ اگەنتتىكتەرى جىل سايىن قازاقستاننىڭ ەكونوميكا دامۋ دەڭگەيى مەن قارجىلىق تۇراقتىلىق دەڭگەيىن باعالايتىنىن ايتىپ، سولاردان فاكتىلەر كەلتىردى، دەپ جازادى Dalanews.kz.
"حالىقارالىق كرەديتتىك رەيتينگتەردە بولعان سوڭعى وزگەرىستەر ەلىمىزدىڭ فيسكالدىق، قارجىلىق تۇراقتىلىعىن ايعاقتايدى. بىزدە ۇلتتىق قور تۇرىندەگى قوماقتى ۆاليۋتالىق رەزەرۆتەر جانە التىن-ۆاليۋتا رەزەرۆتەرى بار. ولاردىڭ كولەمى ءقازىردىڭ وزىندە 100 ملرد دوللاردان استى جانە بۇل ينۆەستيسيانى بەلسەندى تارتۋعا مۇمكىندىك بەرەتىن قارجىلىق قاۋىپسىزدىك جاستىعى بولىپ تابىلادى.ءبىز مەملەكەتتىك قارجىنى باسقارۋ تۇجىرىمداماسىن قابىلدادىق. وندا مەملەكەتتىك قارىز، تۇتاستاي العاندا، ەلدىڭ جالپى ىشكى ءونىمىنىڭ 32%-نان اسپاۋى كەرەكتىگى جونىندە شەكتەۋلەر جازىلعان. ءقازىر بۇل كورسەتكىش شامامەن 23%-دى قۇراپ وتىر، ياعني بۇل مەملەكەتتىك قارىزدىڭ كولەمى بويىنشا جەتكىلىكتى ءقاۋىپسىز ءارى قولايلى دەڭگەيدە ەكەنىمىزدى بىلدىرەدى"، - دەدى نۇرلان بايبازاروۆ.
سونداي-اق ۇلتتىق ەكونوميكا ءمينيسترى بۇل قارىزدى ينۆەستيسيا رەتىندە قاراستىرۋ كەرەكتىگىن، وسى ينۆەستيسيالاردى تارتۋ ارقىلى جالپى ەكونوميكانى دامىتۋعا مۇمكىندىك بەرەتىن اكتيۆتەردى جاسايتىندىعىمىزدى اتاپ ءوتتى.
"ءبىز جول سالامىز، ينفراقۇرىلىمعا ينۆەستيسيا سالامىز، جاڭا ءوندىرىستى ىسكە قوسامىز. بۇل ەلىمىزدىڭ ەكونوميكالىق ءوسۋىن قامتاماسىز ەتۋ ءۇشىن، بولاشاقتا ەكونوميكالىق دامۋدىڭ بەرىك نەگىزىن قالىپتاستىرادى"، - دەيدى مينيستر.
قارجى مينيسترلىگىنىڭ مالىمەتىنشە، 2024 جىلعى 1 قازانداعى جاعداي بويىنشا مەملەكەتتىك قارىز 30 ترلن 504،8 ملرد تەڭگەنى قۇرايدى. بۇل - ەلىمىزدىڭ ءجىو كولەمىنىڭ 22،6%-ى. كۇنى كەشە 2025-2027 جىلدارعا ارنالعان رەسپۋبليكالىق بيۋدجەت تۋرالى زاڭ جوباسىن سەناتورلار قابىلداماي، ماجىلىسكە كەرى قايتاردى. ايتىلعان سىندار ىشىندە وسى مەملەكەتتىك قارىز ماسەلەسى دە قامتىلادى. "2025 جىلى مەملەكەتتىك قارىزعا قىزمەت كورسەتۋ قۇنى 2،5 ترلن تەڭگەنى قۇرايدى، بۇل سىني دەڭگەيگە جاقىن"، - دەدى سەناتور سۇلتانبەك ماكەجانوۆ.
