Premer-ministrdiń orynbasary – Ulttyq ekonomika ministri Nurlan Baibazarov Senat Parlamentiniń dálizinde memlekettik qaryz kólemi týraly jýrnalister suraǵyna jaýap berdi. Vitse-premer óz sózinde Halyqaralyq valiýta qory, Dúniejúzilik bank jáne halyqaralyq reiting agenttikteri jyl saiyn Qazaqstannyń ekonomika damý deńgeii men qarjylyq turaqtylyq deńgeiin baǵalaitynyn aityp, solardan faktiler keltirdi, dep jazady Dalanews.kz.
"Halyqaralyq kredittik reitingterde bolǵan sońǵy ózgerister elimizdiń fiskaldyq, qarjylyq turaqtylyǵyn aiǵaqtaidy. Bizde Ulttyq qor túrindegi qomaqty valiýtalyq rezervter jáne altyn-valiýta rezervteri bar. Olardyń kólemi qazirdiń ózinde 100 mlrd dollardan asty jáne bul investitsiiany belsendi tartýǵa múmkindik beretin qarjylyq qaýipsizdik jastyǵy bolyp tabylady.Biz Memlekettik qarjyny basqarý tujyrymdamasyn qabyldadyq. Onda memlekettik qaryz, tutastai alǵanda, eldiń jalpy ishki óniminiń 32%-nan aspaýy kerektigi jóninde shekteýler jazylǵan. Qazir bul kórsetkish shamamen 23%-dy qurap otyr, iaǵni bul memlekettik qaryzdyń kólemi boiynsha jetkilikti qaýipsiz ári qolaily deńgeide ekenimizdi bildiredi", - dedi Nurlan Baibazarov.
Sondai-aq Ulttyq ekonomika ministri bul qaryzdy investitsiia retinde qarastyrý kerektigin, osy investitsiialardy tartý arqyly jalpy ekonomikany damytýǵa múmkindik beretin aktivterdi jasaityndyǵymyzdy atap ótti.
"Biz jol salamyz, infraqurylymǵa investitsiia salamyz, jańa óndiristi iske qosamyz. Bul elimizdiń ekonomikalyq ósýin qamtamasyz etý úshin, bolashaqta ekonomikalyq damýdyń berik negizin qalyptastyrady", - deidi ministr.
Qarjy ministrliginiń málimetinshe, 2024 jylǵy 1 qazandaǵy jaǵdai boiynsha memlekettik qaryz 30 trln 504,8 mlrd teńgeni quraidy. Bul - elimizdiń JIÓ kóleminiń 22,6%-y. Kúni keshe 2025-2027 jyldarǵa arnalǵan respýblikalyq biýdjet týraly zań jobasyn senatorlar qabyldamai, Májiliske keri qaitardy. Aitylǵan syndar ishinde osy memlekettik qaryz máselesi de qamtylady. "2025 jyly memlekettik qaryzǵa qyzmet kórsetý quny 2,5 trln teńgeni quraidy, bul syni deńgeige jaqyn", - dedi senator Sultanbek Mákejanov.
