استانا قالاسىنىڭ اكىمى جەڭىس قاسىمبەك الەۋمەتتىك پاراقشاسىندا شاھاردا كەزەكتى مەكتەپ اشىلعانىن ءمالىم ەتتى، – دەپ حابارلايدى Dalanews.kz استانا قالاسى اكىمىنىڭ باسپا ءسوز قىزمەتىنە سىلتەمە جاساپ.
– استانادا ون جەتىنشى جاڭا مەكتەپ اشىلدى. بۇل ەلوردا ءۇشىن ءابسوليۋتتى رەكورد بولىپ سانالادى!
قاسىم قايسەنوۆ كوشەسى، 4/1 مەكەنجايىندا ورنالاسقان جاڭا وقۋ ورنى «جايلى مەكتەپ» ۇلتتىق جوباسى اياسىندا سالىنعان. مەكتەپ وقۋشىلاردىڭ ىڭعايلىلىعى ءۇشىن قاجەت نارسەنىڭ بارىمەن جابدىقتالعان.
مەملەكەت باسشىسىنىڭ «جايلى مەكتەپ» ۇلتتىق جوباسى اياسىندا ەلوردادا جاڭا ۇلگىدەگى 10 مەكتەپ سالىنىپ، ەسىگىن ايقارا اشتى. وسى ۇلتتىق جوبا اياسىندا 2024-2025 جىلدار ارالىعىندا جاڭا فورماتتاعى 24 مەكتەپ سالىنادى. وسى مەكتەپتەردىڭ ءوزى ەكى اۋىسىمدا 90 مىڭعا جۋىق وقۋشى ورنىن اشۋعا مۇمكىندىك بەرەدى.
جىل سوڭىنا دەيىن تاعى بىرنەشە مەكتەپ اشۋدى جوسپارلاپ وتىرمىز. وسىلايشا، تاعى 4 مەكتەپتىڭ ءۇش اۋىسىمدى وقىتۋ پروبلەماسى، سول سياقتى تىعىزدىلىعى جوعارى 3 مەكتەپتىڭ قيىندىعى شەشىلەتىن بولادى.
ءبىز سونداي-اق الداعى جىلدارعا دا دايىندالىپ وتىرمىز. 2025 جىلى تاعى 20-دان استام مەكتەپ سالىپ، پايدالانۋعا بەرۋدى جوسپارلاپ وتىرمىز. وقۋ ورىندارىنىڭ قۇرىلىسىنا جەكە ينۆەستيسيالار دا تارتامىز، – دەپ جازدى جەڭىس قاسىمبەك.
