شىمكەنت قالاسىندا بۇرىن ءتۇرلى جولدارمەن جەكەمەنشىككە ءوتىپ كەتكەن الەۋمەتتىك ماڭىزى بار نىسانداردى مەملەكەت مەنشىگىنە قايتارۋ جۇمىستارى ءجۇرىپ جاتىر. بۇل تۋرالى قالا اكىمى عابيت سىزدىقبەكوۆ مالىمدەدءى، دەپ حابارلايدى Dalanews.kz.
"قازىرگى تاڭدا ءبىز ءۇشىن ماڭىزدى باستامالاردىڭ ءبىرى – الەۋمەتتىك ماڭىزى بار نىسانداردى مەملەكەتكە قايتارۋ. بۇرىن ءتۇرلى جولدارمەن جەكە مەنشىككە ءوتىپ كەتكەن نىسانداردى مۇقيات تەكسەرىپ، ماقساتسىز پايدالانعان جانە تالاپتاردى ورىنداماعان جاعدايلار انىقتالدى. زاڭسىز ارەكەتتەرگە جول بەرىلگەن نىسانداردى عانا قايتارۋ ماسەلەسىن كوتەرۋدەمىز. ال، ءوز جۇمىسىن زاڭ اياسىندا اتقارىپ جاتقان مەنشىك يەلەرىنە الاڭداۋعا سەبەپ جوق. وتكەن جىلى بۇرىنعى "فوسفورشىلار سارايى" مەملەكەت مەنشىگىنە قايتارىلىپ، عيماراتتىڭ جارامسىزدىعىنا بايلانىستى بۇزۋ جۇمىستارى اياقتالدى. الداعى ۋاقىتتا دەمەۋشىلەردىڭ قولداۋىمەن ونىڭ ورنىنا جاڭا مادەني نىسان سالۋ جوسپارلانۋدا"، – دەدى عابيت سىزدىقبەكوۆ.
اكىمنىڭ ايتۋىنشا، قالاداعى جالعىز "مۇز سارايىنىڭ" 67%-دىق ۇلەسى مەملەكەتكە قايتارىلعان. بۇل نىساننىڭ باسقارۋ قۇقىعى ەندى مەملەكەتتىڭ يەلىگىندە ەكەنىن بىلدىرەدى.
"سونداي-اق، مىندەتتەمەلەرىن ورىنداماعان جەكە كاسىپكەرگە سەنىمگەرلىك باسقارۋعا بەرىلگەن №2 قالالىق ەمحانانىڭ كەلىسىمشارتى بۇزىلىپ، ول مەملەكەتكە قايتارىلدى. وسىعان ۇقساس جاعداي "ورتالىق سۋ سپورت كەشەنىنە" قاتىستى تىركەلىپ، قازىرگى ۋاقىتتا سوتتا قارالۋدا.
قالا تۇرعىندارىنىڭ ءوتىنىشى بويىنشا، كوممەرسيالىق ماقساتتا پايدالانىلعان "قيال الەمى" تەحنوپاركى مەن "كەڭ بابا" ساياباعىن مەملەكەت مەنشىگىنە قايتارىپ، ولاردى قايتا اباتتاندىرۋ جۇمىستارى دەمەۋشىلەردىڭ قولداۋىمەن جۇزەگە اسىرىلۋدا. سونىمەن قاتار، "قيال الەمى" ساياباعىنا ىرگەلەس جاتقان اياقتالماعان ساۋدا ورتالىعىنىڭ جەرى دە مەملەكەتكە قايتارىلدى. قۇرىلىس نىسانىن بۇزۋ ماسەلەسى سوت قاراۋىندا"، – دەدى اكىم.
ونىڭ ايتۋىنشا، "سۋ رەسۋرستارى ماركەتينگ" ج ش س جەكەشەلەندىرۋ قۇجاتتارىن تەكسەرۋ بارىسىندا دا زاڭبۇزۋشىلىقتار انىقتالعان. كومپانيانىڭ قىزمەتىنە قاتىستى دا ءبىرقاتار ماسەلە بار.
"قازىرگى ۋاقىتتا بۇل باعىتتا زاڭ اياسىندا ءتيىستى جۇمىستار جۇرگىزىلىپ جاتىر"، – دەپ تولىقتىردى عابيت سىزدىقبەكوۆ.
