Shymkent qalasynda buryn túrli joldarmen jekemenshikke ótip ketken áleýmettik mańyzy bar nysandardy memleket menshigine qaitarý jumystary júrip jatyr. Bul týraly qala ákimi Ǵabit Syzdyqbekov málimdedi, dep habarlaidy Dalanews.kz.
"Qazirgi tańda biz úshin mańyzdy bastamalardyń biri – áleýmettik mańyzy bar nysandardy memleketke qaitarý. Buryn túrli joldarmen jeke menshikke ótip ketken nysandardy muqiiat tekserip, maqsatsyz paidalanǵan jáne talaptardy oryndamaǵan jaǵdailar anyqtaldy. Zańsyz áreketterge jol berilgen nysandardy ǵana qaitarý máselesin kóterýdemiz. Al, óz jumysyn zań aiasynda atqaryp jatqan menshik ielerine alańdaýǵa sebep joq. Ótken jyly burynǵy "Fosforshylar saraiy" memleket menshigine qaitarylyp, ǵimarattyń jaramsyzdyǵyna bailanysty buzý jumystary aiaqtaldy. Aldaǵy ýaqytta demeýshilerdiń qoldaýymen onyń ornyna jańa mádeni nysan salý josparlanýda", – dedi Ǵabit Syzdyqbekov.
Ákimniń aitýynsha, qaladaǵy jalǵyz "Muz saraiynyń" 67%-dyq úlesi memleketke qaitarylǵan. Bul nysannyń basqarý quqyǵy endi memlekettiń ieliginde ekenin bildiredi.
"Sondai-aq, mindettemelerin oryndamaǵan jeke kásipkerge senimgerlik basqarýǵa berilgen №2 qalalyq emhananyń kelisimsharty buzylyp, ol memleketke qaitaryldy. Osyǵan uqsas jaǵdai "Ortalyq sý sport keshenine" qatysty tirkelip, qazirgi ýaqytta sotta qaralýda.
Qala turǵyndarynyń ótinishi boiynsha, kommertsiialyq maqsatta paidalanylǵan "Qiial álemi" tehnoparki men "Keń baba" saiabaǵyn memleket menshigine qaitaryp, olardy qaita abattandyrý jumystary demeýshilerdiń qoldaýymen júzege asyrylýda. Sonymen qatar, "Qiial álemi" saiabaǵyna irgeles jatqan aiaqtalmaǵan saýda ortalyǵynyń jeri de memleketke qaitaryldy. Qurylys nysanyn buzý máselesi sot qaraýynda", – dedi ákim.
Onyń aitýynsha, "Sý Resýrstary Marketing" JShS jekeshelendirý qujattaryn tekserý barysynda da zańbuzýshylyqtar anyqtalǵan. Kompaniianyń qyzmetine qatysty da birqatar másele bar.
"Qazirgi ýaqytta bul baǵytta zań aiasynda tiisti jumystar júrgizilip jatyr", – dep tolyqtyrdy Ǵabit Syzdyqbekov.
