ق ر ۇلتتىق بانكىنىڭ ساراپشىلار قاۋىمداستىعى اراسىندا جۇرگىزگەن كەزەكتى ماكروەكونوميكالىق ساۋالناماسىنىڭ ناتيجەلەرى جاريالاندى. وعان سايكەس، تەڭگە باعامى، ينفلياسيا، ءتىپتى بازالىق سىياقى مولشەرلەمەسى بويىنشا كۇتىلەتىن بولجامدار كوڭىل كونشىتپەيدى، دەپ جازادى Dalanews.kz.
2025 جىلعا ارنالعان بازالىق مولشەرلەمەنىڭ بولجامدارى ساراپشىلاردىڭ ينفلياسيالىق كۇتۋلەرىنە سايكەس، 2025 جىلى 12،0%-دان 12،5%-عا دەيىن وزگەرىپ وتىر. 2026 جىلعا ارنالعان باعالاۋلار 10،1%-دان 10،3%-عا دەيىن تۇزەتىلىپ، 2024 جىلعا بولجامداردىڭ مەديانالىق ماندەرى قازىرگى - 14،6% دەڭگەيىندە ساقتالادى.
ۇلتتىق ۆاليۋتانىڭ 1 اقش دوللارىنا شاققانداعى ورتاشا بولجامدى باعامى 2024 جىلى - 464-تەن 466،5 تەڭگە، 2025 جىلى 484-تەن 486،9 تەڭگە جانە 2026 جىلى 494،3 تەڭگەدەن 498،3 تەڭگە بولىپ قايتا تۇزەتىلدى.
ساراپشىلار 2025 جىلعا ينفلياسيا بولجامدارىن 6،7%-دان 6،9%-عا تۇزەتتى، 2024 جىلى 8،4% جانە 2026 جىلى 6،0% دەڭگەيىندە قالدىرىپ، بولجام پەسسيميستىك سيپاتقا يە بولدى.
بيىل قاراشا ايىندا 2025 جانە 2026 جىلدارعا ارنالعان مۇناي باعاسى بويىنشا سەناريي شارتتارى جاڭارتىلعان. مەديانالىق كۇتۋلەرگە سايكەس، 2025 جىلى Brent ماركالى مۇنايدىڭ ءبىر باررەلىنىڭ باعاسى 76،5 اقش دوللارى دەڭگەيىندە قالىپتاسادى (بۇعان دەيىن – 75،0 اقش دوللارى). 2026 جىلعا قاراي بولجام بويىنشا بۇل باعا 74 دوللارعا دەيىن تومەندەتىلگەن. 2024 جىلعا كۇتۋلەر 80،4 اقش دوللار دەڭگەيىندە قالىپتاستى.
قازاقستاننىڭ ءجىو-نىڭ ءوسىمى بويىنشا 2024 جىلعا ارنالعان بولجامدارى 4%-دان 4،2%-عا دەيىن ءوسۋ جاعىنا قايتا قارالىپتى. رەسپوندەنتتەردىڭ 2025 جىلعا ارنالعان كۇتۋلەرى 5%-دان 4،7%-عا دەيىن تومەندەتىلدى. 2026 جىلعا ەكونوميكانىڭ ءوسۋى بويىنشا بولجام 4،5% دەڭگەيىندە ساقتالعان.
"Brent ماركالى مۇنايدىڭ باعاسى، قازاقستان ەكونوميكاسىنىڭ ءوسىمى، ينفلياسيا، بازالىق مولشەرلەمە، تاۋارلار مەن قىزمەتتەردىڭ ەكسپورتى جانە يمپورتى، سونداي-اق ۇلتتىق ۆاليۋتا باعامىنىڭ ءمانى – ساۋالنامانىڭ نەگىزگى پارامەترلەرى بولدى. ساۋالناماعا قازاقستان بويىنشا ماكروەكونوميكالىق كورسەتكىشتەردى تالداۋمەن جانە بولجاۋمەن اينالىساتىن 13 ۇيىم قاتىستى. رەسپوندەنتتەردىڭ قاتارىنا نارىقتىڭ كاسىبي قاتىسۋشىلارى، زەرتتەۋ ينستيتۋتتارى، حالىقارالىق ۇيىمدار، سونداي-اق رەيتينگتىك اگەنتتىكتەر كىرەدى"، دەلىنگەن ق ر ۇلتتىق بانك حابارلاماسىندا.
