رەسەي پرەزيدەنتى ۆلاديمير پۋتين استاناعا “ماڭىزدى قۇجاتتارعا” قول قويۋ ءۇشىن كەلەدى. ونىڭ ساپارى 27 قاراشاعا جوسپارلانعان،  دەپ حابارلايدى Dalanews.kz.

بۇل تۋرالى قازاقستان پارلامەنتى سەناتىنىڭ ءتوراعاسى ماۋلەن اشىمبايەۆ رەسەي فەدەراسيا كەڭەسىنىڭ ءتوراعاسى ۆالەنتينا ماتۆيەنكومەن ەكىجاقتى كەزدەسۋ بارىسىندا مالىمدەدى.

“ءبىزدىڭ ەلشىلىك پەن ۇكىمەت تە بەلسەندى جۇمىس اتقارىپ جاتىر. بۇل ساپاردىڭ ماڭىزى زور. سەبەبى اسا ماڭىزدى كەلىسىمدەر تالقىلانىپ، ماڭىزدى قۇجاتتارعا قول قويىلادى. ساپار اياسىندا باسقا دا شارالار جوسپارلانعان. ۆلاديمير ءۆلاديميروۆيچتىڭ قازاقستانعا مەملەكەتتىك ساپارى ەڭ جوعارى دەڭگەيدە وتەتىنىنە سەنىمدىمىن”، – دەدى اشىمبايەۆ.

سونىمەن قاتار پۋتيننەن كەيىن ۆالەنتينا ماتۆيەنكو دا رەسمي ساپارمەن كەلمەك.

ساپار بارىسىندا ەكى تاراپ پارلامەنتتەردىڭ جوعارعى پالاتالارى اپپاراتتارىنىڭ باسشىلارى اراسىنداعى كەلىسىمگە قول قويۋى مۇمكىن.

ۆالەنتينا ماتۆيەنكونىڭ ايتۋىنشا، رەسەي پرەزيدەنتى ۆلاديمير ءپۋتيننىڭ قازاقستانعا ساپارى “رەسەي مەن قازاقستان قارىم-قاتىناسىنداعى باستى وقيعاعا” اينالماق.

“بۇل وقيعا كوپجاقتى، ءوزارا ءتيىمدى جانە ءوزارا قۇرمەتكە نەگىزدەلگەن رەسەي مەن قازاقستان ىنتىماقتاستىعىنىڭ بولاشاق باعىتىن ايقىندايدى. ارينە، بۇل ءبىزدىڭ پارلامەنتتىك قارىم-قاتىناسىمىزدى دا قامتيدى. ساپاردىڭ ناتيجەسىن مۇقيات باقىلاپ وتىرامىز. مەملەكەتتىك ساپاردان كەيىن ءوزارا تالقىلاپ، پارلامەنتتىك قىزمەتىمىزدى قالاي قۇرۋ كەرەگىن انىقتايتىن مۇمكىندىك بولادى”، – دەدى ۆالەنتينا ماتۆيەنكو.

رەسەي پرەزيدەنتىنىڭ مەملەكەتتىك ساپارى 27 قاراشاعا جوسپارلانعان. بيىل شىلدە ايىندا ۆلاديمير پۋتين استاناعا كەلىپ، شانحاي ىنتىماقتاستىق ۇيىمىنىڭ سامميتىنە قاتىسقان بولاتىن.

ەسكە سالايىق، كۇنى كەشە رەسەي پرەزيدەنتى ۆلاديمير پۋتين ۋكرايناداعى قاقتىعىستىڭ عالامدىق سيپاتقا يە بولعانىن مالىمدەگەن ەدى.

وسىلايشا رەسەي پرەزيدەنتى ۋكراينامەن قازىرگى قارىم-قاتىناستىڭ جاعدايىن سيپاتتادى. بۇعان دەيىن ول ۋكراينا 19 جانە 21 قاراشادا كۋرسك جانە بريانسك وبلىستارىنداعى نىساندارعا باتىستىق زىمىراندارمەن سوققى جاساعانىن راستاعان ەدى.

ونىڭ ايتۋىنشا، رەسەي كۇشتەرى بۇعان جاۋاپ رەتىندە سوققى بەرگەن، ونىڭ ىشىندە تاجىريبەلىك قارۋ قولدانىلعان. رف “ورەشنيك” يادرولىق ەمەس گيپەردىبىستىق بالليستيكالىق زىمىرانمەن وڭتۇستىك ماشينا جاساۋ زاۋىتىنا جانە ۋكراينانىڭ قورعانىس-ونەركاسىپتىك كەشەنىنىڭ نىسانىنا بىرىكتىرىلگەن سوققى جاساعان.

پۋتين رەسەي ەسكالاسياعا جاۋاپ بەرەتىنىن جانە ءوزىنىڭ نىساندارىنا شەتەلدىك قارۋدى قولدانۋعا رۇقسات بەرگەن ەلدەردىڭ نىساندارىنا قارۋ قولدانۋعا قۇقىعى بار دەپ ەسەپتەيتىنىن اتاپ ءوتتى.

سونىمەن قاتار، ول رەسەي “ورەشنيك” سياقتى جۇيەلەرمەن سوققى جاسايتىن كەزدە ۋكراينانىڭ بەيبىت تۇرعىندارىنا ءقاۋىپتى ايماقتى الدىن الا تاستاپ شىعۋدى ۇسىناتىنىن ايتتى.

قورىتا ايتقاندا پۋتين مالىمدەمەسىندە: 

• "ۋكراينا باتىستىڭ الىستى كوزدەيتىن زىمىراندارىمەن رەسەيگە سوققى جاسادى"
• "كۋرسكى جانە بريانسكى وبلىستارىنا قاراتا امەريكالىق ATACMS-تار اتىلدى. ءبىراق ولار كوزدەگەن ماقساتتارىنا جەتپەدى. ءبىزدىڭ ءاشققج قاعىپ ءتۇسىردى"
• "ونان سوڭ ۇلىبريتانيانىڭ الىستى كوزدەيتىن Storm Shadow زىمىراندارى اتىلدى. ولار دا ناتيجەسىز بولدى"
• "ماماندار بىلەدى. بۇل زىمىرانداردى باتىستىڭ، ءوندىرۋشى ەلدىڭ كومەگىنسىز اتۋ مۇمكىن ەمەس"
• "ءبىز ەسكەرتتىك. العاش رەت زاماناۋي ءھام تەڭدەسسىز كونتينەنتارالىق “ورەشنيك” باليستيكالىق زىمىرانىمەن ۋكراينانىڭ دنەپرىنە سوققى جاسادىق. بۇل ءبىزدىڭ جاۋابىمىز!"
• "ءبىز وسى جانە وسىنداي جاڭا ءارى زاماناۋي زىمىرانداردى قولداناردا حالىققا الدىن الا ەسكەرتەمىز!"
• "بۇل جولى ءبىز يادرولىق وقتۇمسىقتار قولدانبادىق"