Resei prezidenti Vladimir Pýtin Astanaǵa “mańyzdy qujattarǵa” qol qoiý úshin keledi. Onyń sapary 27 qarashaǵa josparlanǵan, dep habarlaidy Dalanews.kz.
Bul týraly Qazaqstan Parlamenti Senatynyń tóraǵasy Máýlen Áshimbaev Resei Federatsiia keńesiniń tóraǵasy Valentina Matvienkomen ekijaqty kezdesý barysynda málimdedi.
“Bizdiń elshilik pen úkimet te belsendi jumys atqaryp jatyr. Bul sapardyń mańyzy zor. Sebebi asa mańyzdy kelisimder talqylanyp, mańyzdy qujattarǵa qol qoiylady. Sapar aiasynda basqa da sharalar josparlanǵan. Vladimir Vladimirovichtiń Qazaqstanǵa memlekettik sapary eń joǵary deńgeide ótetinine senimdimin”, – dedi Áshimbaev.
Sonymen qatar Pýtinnen keiin Valentina Matvienko da resmi saparmen kelmek.
Sapar barysynda eki tarap parlamentterdiń joǵarǵy palatalary apparattarynyń basshylary arasyndaǵy kelisimge qol qoiýy múmkin.
Valentina Matvienkonyń aitýynsha, Resei prezidenti Vladimir Pýtinniń Qazaqstanǵa sapary “Resei men Qazaqstan qarym-qatynasyndaǵy basty oqiǵaǵa” ainalmaq.
“Bul oqiǵa kópjaqty, ózara tiimdi jáne ózara qurmetke negizdelgen Resei men Qazaqstan yntymaqtastyǵynyń bolashaq baǵytyn aiqyndaidy. Árine, bul bizdiń parlamenttik qarym-qatynasymyzdy da qamtidy. Sapardyń nátijesin muqiiat baqylap otyramyz. Memlekettik sapardan keiin ózara talqylap, parlamenttik qyzmetimizdi qalai qurý keregin anyqtaityn múmkindik bolady”, – dedi Valentina Matvienko.
Resei prezidentiniń memlekettik sapary 27 qarashaǵa josparlanǵan. Biyl shilde aiynda Vladimir Pýtin Astanaǵa kelip, Shanhai yntymaqtastyq uiymynyń sammitine qatysqan bolatyn.
Eske salaiyq, kúni keshe Resei prezidenti Vladimir Pýtin Ýkrainadaǵy qaqtyǵystyń ǵalamdyq sipatqa ie bolǵanyn málimdegen edi.
Osylaisha Resei prezidenti Ýkrainamen qazirgi qarym-qatynastyń jaǵdaiyn sipattady. Buǵan deiin ol Ýkraina 19 jáne 21 qarashada Kýrsk jáne Briansk oblystaryndaǵy nysandarǵa batystyq zymyrandarmen soqqy jasaǵanyn rastaǵan edi.
Onyń aitýynsha, Resei kúshteri buǵan jaýap retinde soqqy bergen, onyń ishinde tájiribelik qarý qoldanylǵan. RF “Oreshnik” iadrolyq emes giperdybystyq ballistikalyq zymyranmen Ońtústik mashina jasaý zaýytyna jáne Ýkrainanyń qorǵanys-ónerkásiptik kesheniniń nysanyna biriktirilgen soqqy jasaǵan.
Pýtin Resei eskalatsiiaǵa jaýap beretinin jáne óziniń nysandaryna sheteldik qarýdy qoldanýǵa ruqsat bergen elderdiń nysandaryna qarý qoldanýǵa quqyǵy bar dep esepteitinin atap ótti.
Sonymen qatar, ol Resei “Oreshnik” siiaqty júielermen soqqy jasaityn kezde Ýkrainanyń beibit turǵyndaryna qaýipti aimaqty aldyn ala tastap shyǵýdy usynatynyn aitty.
Qoryta aitqanda Pýtin málimdemesinde:
- "Ýkraina Batystyń alysty kózdeitin zymyrandarymen Reseige soqqy jasady"
- "Kýrski jáne Brianski oblystaryna qarata amerikalyq ATACMS-tar atyldy. Biraq olar kózdegen maqsattaryna jetpedi. Bizdiń ÁShQQJ qaǵyp túsirdi"
- "Onan soń Ulybritaniianyń alysty kózdeitin Storm Shadow zymyrandary atyldy. Olar da nátijesiz boldy"
- "Mamandar biledi. Bul zymyrandardy Batystyń, óndirýshi eldiń kómeginsiz atý múmkin emes"
- "Biz eskerttik. Alǵash ret zamanaýi hám teńdessiz kontinentaralyq “Oreshnik” balistikalyq zymyranymen Ýkrainanyń Dneprine soqqy jasadyq. Bul bizdiń jaýabymyz!"
- "Biz osy jáne osyndai jańa ári zamanaýi zymyrandardy qoldanarda halyqqa aldyn ala eskertemiz!"
- "Bul joly biz iadrolyq oqtumsyqtar qoldanbadyq"
