الماتى وبلىسىنداعى “لەرۋا مەرلەن” قۇرىلىس سۋپەرماركەتىنە تاۋاردى باعاسىنان جوعارى ساتقانى ءۇشىن 30 اەك (103،5 مىڭ تەڭگە) كولەمىندە ايىپپۇل سالىندى. بۇل زاڭبۇزۋشىلىق ساتىپ الۋشىنىڭ شاعىمىنان كەيىن انىقتالدى، دەپ حابارلايدى Dalanews.kz.

“الماتى وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى “لەرۋا مەرلەن” جشس-نە قاتىستى جوسپاردان تىس تەكسەرۋ ناتيجەسىندە ق ر اكىمشىلىك قۇقىق بۇزۋشىلىق تۋرالى كودەكسىنىڭ 193-بابىنىڭ 4-بولىگى بويىنشا اكىمشىلىك قۇقىق بۇزۋشىلىق تۋرالى حاتتاما تولتىردى. سالىنعان ايىپپۇل سوماسى 30 اەك-تى قۇرادى”، – دەلىنگەن ق ر ساۋدا جانە ينتەگراسيا مينيسترلىگى ساۋدا كوميتەتىنىڭ حابارلاماسىندا.

قىركۇيەك ايىندا الماتى وبلىسىنىڭ تۇرعىنى “ە-وتىنىش” پلاتفورماسى ارقىلى قۇرىلىس سۋپەرماركەتىنە قاتىستى شاعىم تۇسىرگەن. ساتىپ الۋشى تاۋاردىڭ باعاسى سورەدە 1550 تەڭگە دەپ كورسەتىلسە دە، كاسسادا 2880 تەڭگەگە ساتىلعانىن ايتقان.

شاعىمنان كەيىن جوسپاردان تىس تەكسەرۋ جۇرگىزىلىپ، ءبىر تاۋارعا ەكى ءتۇرلى باعا بەلگىسى قويىلعانى راستالدى.

“ساۋدا قىزمەتىن رەتتەيتىن ەرەجەلەردىڭ 2-تاراۋىنىڭ 54-تارماعىنا سايكەس، ساتۋشى ساۋدا وبەكتىسىنىڭ ىشكى نەمەسە سىرتقى سورەلەرىندە كورسەتىلگەن باعامەن تاۋار ساتۋعا مىندەتتى. ەگەر تاۋار قازاقستان رەسپۋبليكاسىندا باعا بەلگىسىندە كورسەتىلگەن سومادان جوعارى باعاعا ساتىلسا، اكىمشىلىك قۇقىق بۇزۋشىلىق تۋرالى كودەكستىڭ 193-بابىنىڭ 4-بولىگىنە سايكەس جاۋاپكەرشىلىك قاراستىرىلعان”، – دەپ اتاپ ءوتتى كوميتەت.

اكىمشىلىك ايىپپۇل سوماسىنىڭ جارتىسىن تولەۋ قۇقىعى پايدالانىلدى. سونداي-اق باسشىلىققا انىقتالعان زاڭبۇزۋشىلىقتاردى جويۋ تۋرالى نۇسقاما بەرىلدى.