Almaty oblysyndaǵy “Lerýa Merlen” qurylys sýpermarketine taýardy baǵasynan joǵary satqany úshin 30 AEK (103,5 myń teńge) kóleminde aiyppul salyndy. Bul zańbuzýshylyq satyp alýshynyń shaǵymynan keiin anyqtaldy, dep habarlaidy Dalanews.kz.
“Almaty oblysy boiynsha Saýda jáne tutynýshylardyń quqyqtaryn qorǵaý departamenti “Lerýa Merlen” JShS-ne qatysty jospardan tys tekserý nátijesinde QR Ákimshilik quqyq buzýshylyq týraly kodeksiniń 193-babynyń 4-bóligi boiynsha ákimshilik quqyq buzýshylyq týraly hattama toltyrdy. Salynǵan aiyppul somasy 30 AEK-ti qurady”, – delingen QR Saýda jáne integratsiia ministrligi Saýda komitetiniń habarlamasynda.
Qyrkúiek aiynda Almaty oblysynyń turǵyny “E-ótinish” platformasy arqyly qurylys sýpermarketine qatysty shaǵym túsirgen. Satyp alýshy taýardyń baǵasy sórede 1550 teńge dep kórsetilse de, kassada 2880 teńgege satylǵanyn aitqan.
Shaǵymnan keiin jospardan tys tekserý júrgizilip, bir taýarǵa eki túrli baǵa belgisi qoiylǵany rastaldy.
“Saýda qyzmetin retteitin erejelerdiń 2-taraýynyń 54-tarmaǵyna sáikes, satýshy saýda obektisiniń ishki nemese syrtqy sórelerinde kórsetilgen baǵamen taýar satýǵa mindetti. Eger taýar Qazaqstan Respýblikasynda baǵa belgisinde kórsetilgen somadan joǵary baǵaǵa satylsa, Ákimshilik quqyq buzýshylyq týraly kodekstiń 193-babynyń 4-bóligine sáikes jaýapkershilik qarastyrylǵan”, – dep atap ótti komitet.
Ákimshilik aiyppul somasynyń jartysyn tóleý quqyǵy paidalanyldy. Sondai-aq basshylyqqa anyqtalǵan zańbuzýshylyqtardy joiý týraly nusqama berildi.
