Onyń aitýynsha, zań jobasynyń ekinshi baǵyty litsenziialaý júiesin jańǵyrtýǵa jáne bank naryǵyna qoljetimdilikti ońtailandyrýǵa arnalǵan.
"Bul bloktaǵy negizgi bastama bazalyq banktik litsenziiany engizý bolyp tabylady, bul jańa qatysýshylardyń paida bolýyna jáne sektordaǵy básekelestiktiń kúsheiýine yqpal etetin neǵurlym ikemdi retteý jaǵdailaryn týdyrady. Bazalyq litsenziia ámbebap litsenziiadan ruqsat etilgen operatsiialardyń kólemi boiynsha da, retteýshi talaptar boiynsha da erekshelenedi. Atap aitqanda, aktivterdiń eń joǵary mólsheri boiynsha shekteýler 500 mlrd teńge deńgeiinde belgilenedi. Bazalyq litsenziiasy bar bankter úshin kapitaldyń eń tómengi mólsheri 10 mlrd teńgeni quraidy, al ámbebap bankter úshin bul shek 20 mlrd teńgege deiin ósedi. Sondai-aq táýekelderdi basqarý jáne esep berý júiesine qoiylatyn talaptar azaiady, qadaǵalaý júktemesi tómendeidi, bul rette turaqtylyqtyń negizgi qaǵidattary saqtalady", - dedi Oljas Qizatov.
Sonymen qatar, Qizatovtyń aitýynsha, táýekelderdi shekteý úshin bazalyq bankterge rezident emesterge nesieler men ózge de kredittik ónimder berýge, sondai-aq bankpen erekshe qatynastaǵy tulǵalarǵa qaryzdar berýge tyiym salynady.
"Budan bólek, jeke tulǵalardyń merzimdi jáne jinaq salymdarynyń jiyntyq mólsherine shekteý engiziledi: 10 mln teńgeden aspaýy tiis. Sondai-aq kúrdeli nemese joǵary táýekeldi qarjy quraldary boiynsha brokerlik jáne dilerlik operatsiialarǵa bailanysty qyzmetke tyiym salynady", - deidi ol.
Ol bazalyq litsenziianyń negizgi áleýetti paidalanýshylarynyń biri biznesti keńeitýge jáne halyq pen biznesten depozitter tartý quqyǵyn alýǵa nietti mikroqarjy uiymdary bolyp tabylatynyn atap ótti. Búgingi tańda 12 MQU-nyń kapitaly 10 mlrd teńgeden asady, al olardyń ekeýi — QMF jáne "BiEnKei Finans Kazahstan" ekinshi deńgeidegi bankke ainalýǵa ruqsat alǵan.
