Ázerbaijandyq ADOG kompaniiasy men Zira halyqaralyq porty Kaspii men Qara teńizdi jalǵaityn jerasty tonnelin salý bastamasyn kóterdi, dep habarlaidy Dalanews.kz.
Jobanyń tujyrymdamasyna sáikes, diametri 10 metrlik jerasty tonneli salynady. Ol Qara teńiz jaǵalaýynan (Grýziia nemese Resei aýmaǵynan) Kaspii teńizine deiin sozylady. Tabiǵi deńgei aiyrmashylyǵyna bailanysty Qara teńizden Kaspiige qarai sý ózdiginen aǵyp ótetin bolady, iaǵni sýdy aidaityn arnaiy sorǵylar qajet emes.
"Bul bastama Kaspii teńiziniń sý deńgeiin turaqtandyrýǵa baǵyttalǵan. Sońǵy jyldary teńiz deńgeii kúrt tómendep, jaǵalaýdaǵy elder úshin ekologiialyq, ekonomikalyq jáne infraqurylymdyq qaýipter týyndaýda", – delingen bastamashylardyń habarlamasynda.
Kompaniia ókilderi jobany júzege asyrý kezinde tolyqqandy ekologiialyq monitoring júrgiziletinin jáne bioalýantúrlilikti saqtaý sharalary qabyldanatynyn atap ótti. ADOG kompaniiasy tehnikalyq-ekonomikalyq negizdeme daiyndaýǵa jáne qajet resýrstardy jumyldyrýǵa daiyn ekenin jetkizdi.
Bastama avtorlary bul usynysty memlekettik deńgeide qarastyryp, ýákiletti organdarǵa aldyn ala konsýltatsiialar júrgizýdi tapsyrýdy surap otyr.
