Qazaqstannyń jergilikti joldarynda jyl basynan beri zerttelgen jol materialdarynyń 32%-y belgilengen talaptarǵa sáikes kelmegen. Jol aktivteri sapasynyń ulttyq ortalyǵynyń málimetinshe, osy kezeńde 15 myńnan astam synama zerthanalyq tekserýden ótken, dep habarlaidy dalanews.kz.
Bul derekter Astanada ótken «Sapaly joldar: josparlaýdan paidalanýǵa deiin» seminar-keńesinde jariialandy. Is-shara QR Kólik ministrligi janynda óńirler men Jol aktivteri sapasynyń ulttyq ortalyǵy filialdarynyń qatysýymen ótti.
Zertteý nátijeleri jol sapasyna qatysty másele nysan paidalanýǵa berilgennen keiin ǵana emes, jol qurylysyna qoldanylatyn materialdardy tańdaý jáne paidalaný kezeńinen bastalatynyn kórsetedi. Zerthanalyq synaqtar talapqa sai emes materialdardy jumystyń bastapqy kezeńinde anyqtaýǵa múmkindik beredi.
Alaida anyqtalǵan kemshilikterdi joiý máselesi áli de ózekti.
Jyl basynan beri jergilikti joldarda 1 997 tehnologiialyq buzýshylyq pen aqaý tirkelgen. Onyń tek 214-i joiylǵan. Qalǵan 1 783 buzýshylyq boiynsha jumystar aiaqtalmaǵan. Iaǵni anyqtalǵan kemshilikterdiń shamamen 89%-y áli saqtalyp otyr.
Budan bólek, 2024–2026 jyldary jergilikti atqarýshy organdar qabyldaǵan 1 127 jol nysanynda júrgizilgen tekserýler barysynda túrli sáikessizdikter anyqtalǵan.
Seminar barysynda óńirlerdegi problemalyq nysandar, zerthanalyq zertteýlerdiń nátijeleri jáne anyqtalǵan aqaýlardyń ýaqytyly joiylmaý sebepteri talqylandy. Tehnikalyq qadaǵalaý, merdigerler, jergilikti tapsyrys berýshiler men Jol aktivteri sapasynyń ulttyq ortalyǵy arasyndaǵy ózara is-qimylǵa da nazar aýdaryldy.
Qatysýshylar qoldanystaǵy normativtik bazadaǵy birqatar qaishylyqtarǵa da toqtaldy. Osyǵan bailanysty jol jumystary men qoldanylatyn materialdardyń sapasyn baǵalaýǵa qoiylatyn talaptardy birizdendirý úshin normativtik qujattardy keshendi qaita qaraý usynyldy.
Seminar qorytyndysy boiynsha jergilikti joldardyń sapasyn arttyrýǵa baǵyttalǵan naqty is-sharalar josparyn ázirleý, jaýapty tulǵalar men aqaýlardy joiý merzimderin belgileý kózdelip otyr. Sondai-aq normativtik bazany jańartý jóninde usynystar ázirlenedi.
Budan bólek, jergilikti jol jelisin damytý boiynsha úsh jyldyq jospar ázirlenip, óńirlik jáne respýblikalyq deńgeide sheshýdi qajet etetin máseleler aiqyndalady.
