Memleket basshysyna Qorǵanys ministrligin tekserý jónindegi komissiia jumysynyń alǵashqy nátijeleri týraly esep berildi, dep habarlaidy dalanews.kz.
Prezident Qasym-Jomart Toqaev Qazaqstan Respýblikasynyń Qorǵanys ministrligindegi isterdiń jai-kúiine keshendi tekserý júrgizý jónindegi komissiia múshelerimen keńes ótkizdi.
Memleket basshysy atqarylǵan jumystyń alǵashqy nátijeleri týraly esepti tyńdady. Komissiia tóraǵasy, Qaýipsizdik Keńesi tóraǵasynyń orynbasary Aida Balaeva tekseristiń negizgi baǵyttary jónindegi qorytyndyny baiandady.
Jiyn barysynda Mańǵystaý oblysyndaǵy qaiǵyly oqiǵa Qarýly kúshterde qordalanǵan júielik máselelerdi áshkerelegeni atap ótildi. Aldyn ala tergeý nátijesi áskeri is-sharalardy josparlaý kezinde óreskel qateler jiberilgenin jáne buǵan deiingi basshylyq tarapynan tiisti qadaǵalaý bolmaǵanyn kórsetti.
Memleket basshysy alǵashqy kadrlyq sheshimder qabyldanǵanyn, alaida áskeri qyzmetshilerdiń qazasyna kináli laýazymdy tulǵalardyń barlyǵy zańǵa sáikes jaýapkershilikke tartylýǵa tiis ekenin málimdedi. Bul másele Prezidenttiń jeke baqylaýynda bolady.
Tekseristiń birinshi kezeńiniń qorytyndysy boiynsha qylmystyq qýdalaý organdary memleket múlkin talan-tarajǵa salý, qyzmetin asyra paidalaný derekterine, sondai-aq, Qorǵanys ministrligine qarasty uiymdar men qurylymdyq bólimsheler qyzmetindegi basqa da zańbuzýshylyqtarǵa qatysty 13 qylmystyq is qozǵady.
Mańǵystaý oblysyndaǵy tragediianyń jai-japsaryn zertteý barysynda oqý-jattyǵý jiyndaryn daiyndaý jáne josparlaý kezinde táýekelderdi baǵalaý, desant túsirýdi uiymdastyrý jáne áskerilerdiń qaýipsizdigin qamtamasyz etýge qatysty eleýli kemshilikterge jol berilgeni anyqtaldy.
Qolbasshylyq quramnyń qylmysqa parapar salǵyrttyǵy boiynsha sotaldy tergeý amaldary jalǵasyp jatyr. Bes laýazymdy tulǵa tutqyndaldy. Tergeý aiaqtalǵan soń olardyń áreketine túbegeili quqyqtyq baǵa beriledi.
Sonymen qatar, áskeri tártip pen aldyn alý jumystarynda birshama kemshilik bary anyqtaldy. Áskerilerge álimjettik jasaý, jarǵyǵa qaishy áreket etý derekteri áshkerelenip, qylmystyq ister qozǵaldy.
Qaýipsizdik talaptaryn, áskeri qyzmetti ótkerý sharttaryn saqtaý, tyldy qamtamasyz etý jáne jeke qurammen tárbie jumysyn uiymdastyrý máselelerine airyqsha mán berilip otyr.
Qasym-Jomart Toqaev komissiiaǵa Qorǵanys ministrliginiń jańa basshylyǵymen birlesip, anyqtalǵan kemshilikterdi joiý jóninde naqty usynystar ázirleýdi tapsyrdy.
Tekseris nátijesi Qarýly kúshterdi reformalaý josparyn daiyndaý kezinde eskerilýge tiis. Jiynda qazirgi zamannyń syn-qaterlerine qarsy tiimdi áreket etetin jańa turpatty armiia qalyptastyrý qajettigine basa mán berildi. Jańǵyrý belgileri áskeri tártiptiń kúsheiýinen, áskeri qyzmetshilerge boryshyn óteý kezinde tiisti jaǵdai jasaýdan jáne qaýipsizdik deńgeiiniń artqanynan baiqalýǵa tiis.
Sonymen qatar, keshendi tekseris obektivti túrde júrgizilip, áskerdiń jaýyngerlik ázirligine nuqsan keltirmeý qajettigi atap ótildi. Qarýly kúshter qatarynda Konstitýtsiiadaǵy "Zań men tártip" qaǵidaty múltiksiz saqtalýy kerek.
Komissiia jumysy jalǵasyp jatyr.
