Astanada blogerler Erbolat Janábilov pen Elmira Tolegenova ústinen qozǵalǵan qylmystyq is boiynsha sot protsesi jalǵasyp jatyr. 30 naýryz kúni sotqa kýálik berý úshin qazaqstandyq blogerler Darhan Jolshybekov jáne Nurbek Nurtaza keldi, dep habarlaidy Dalanews.kz.
Sotta Darhan Jolshybekov 2024 jyly ózi de túrli utys oiyndaryn ótkizgenin, sondai-aq elektrondy kommertsiia boiynsha oqytý kýrsymen ainalysqanyn aitty. Onyń sózinshe, bul kýrstardy ózi daiyndaǵan. Sonymen qatar ol buryn ákimshilik jaýapkershilikke tartylǵanyn rastady.
Memlekettik aiyptaýshy Jolshybekovten aiyptalýshylarmen utys oiyndaryn ótkizý jáne onyń zańdyq táýekelderi týraly sóilesken-sóilespegenin surady. Kýáger Erbolat Janábilovpen bailanys bolǵanyn aitty, biraq naqty ne aitylǵanyn esine túsirý qiyn ekenin jetkizdi.
Osyǵan bailanysty prokýror Jolshybekovtiń 2025 jyldyń qarashasynda tergeý kezinde bergen burynǵy jaýabyn oqyp berdi. Onda bloger ózine qatysty sot isi bastalǵannan keiin Janábilovpen sóileskenin aitqan.
Onyń aitýynsha, Janábilov internetten onyń sotqa tartylǵanyn kórip, qandai jaza alǵanyn suraǵan. Jolshybekov óz kezeginde ákimshilik jaýapkershilikke tartylǵanyn, utys oiyndary úshin ekonomikalyq tergeý departamentine shaqyrylǵanyn aitqan. Sol kezeńde olar jii sóilesken.
Sottaǵy suraqtarǵa jaýap bergen Jolshybekov burynǵy aitqandaryn naqty esine túsire almaitynyn, biraq olardan bas tartpaitynyn málimdedi.
Al Justking atymen tanymal bloger Nurbek Nurtaza sotta mundai áńgimeler bolmaǵanyn aitty. Onyń sózinshe, Janábilovtar odan utys oiyndaryna qatysty jaza nemese zańdyq saldarlar jaily suramaǵan.
Sot barysynda blogerler arasyndaǵy qarym-qatynas pen yqtimal kelispeýshilikter de sóz boldy. Aiyptalýshylardyń advokaty Gaýhar Aitjanovanyń suraqtaryna jaýap bergen Jolshybekov Janábilovtardy alty jyldan astam ýaqyttan beri tanitynyn aitty.
Ol aiyptalýshylarǵa degen jeke ókpesi joq ekenin jetkizdi. Degenmen Erbolat Janábilovpen keide kelispeýshilikter bolǵanyn jasyrmady.
«Tolegenovamen ondai bolǵan joq, al Eramen (Erbolat Janábilov – red.) keide bolyp turatyn. Er adamdar arasynda ondai bolady», – dedi ol.
Advokat sondai-aq 2025 jylǵy 29 naýryzda bolǵan janjal týraly da surady. Bul jaǵdai áleýmettik jelilerde jariialanǵan. Kýáger bul oqiǵanyń bolǵanyn rastady.
