استانادا بلوگەرلەر ەربولات ءجانابىلوۆ پەن ەلميرا تولەگەنوۆا ۇستىنەن قوزعالعان قىلمىستىق ءىس بويىنشا سوت پروسەسى جالعاسىپ جاتىر. 30 ناۋرىز كۇنى سوتقا كۋالىك بەرۋ ءۇشىن قازاقستاندىق بلوگەرلەر دارحان جولشىبەكوۆ جانە نۇربەك نۇرتازا كەلدى، دەپ حابارلايدى Dalanews.kz.
سوتتا دارحان جولشىبەكوۆ 2024 جىلى ءوزى دە ءتۇرلى ۇتىس ويىندارىن وتكىزگەنىن، سونداي-اق ەلەكتروندى كوممەرسيا بويىنشا وقىتۋ كۋرسىمەن اينالىسقانىن ايتتى. ونىڭ سوزىنشە، بۇل كۋرستاردى ءوزى دايىنداعان. سونىمەن قاتار ول بۇرىن اكىمشىلىك جاۋاپكەرشىلىككە تارتىلعانىن راستادى.
مەملەكەتتىك ايىپتاۋشى جولشىبەكوۆتەن ايىپتالۋشىلارمەن ۇتىس ويىندارىن وتكىزۋ جانە ونىڭ زاڭدىق تاۋەكەلدەرى تۋرالى سويلەسكەن-سويلەسپەگەنىن سۇرادى. كۋاگەر ەربولات جانابىلوۆپەن بايلانىس بولعانىن ايتتى، ءبىراق ناقتى نە ايتىلعانىن ەسىنە ءتۇسىرۋ قيىن ەكەنىن جەتكىزدى.
وسىعان بايلانىستى پروكۋرور جولشىبەكوۆتىڭ 2025 جىلدىڭ قاراشاسىندا تەرگەۋ كەزىندە بەرگەن بۇرىنعى جاۋابىن وقىپ بەردى. وندا بلوگەر وزىنە قاتىستى سوت ءىسى باستالعاننان كەيىن جانابىلوۆپەن سويلەسكەنىن ايتقان.
ونىڭ ايتۋىنشا، ءجانابىلوۆ ينتەرنەتتەن ونىڭ سوتقا تارتىلعانىن كورىپ، قانداي جازا العانىن سۇراعان. جولشىبەكوۆ ءوز كەزەگىندە اكىمشىلىك جاۋاپكەرشىلىككە تارتىلعانىن، ۇتىس ويىندارى ءۇشىن ەكونوميكالىق تەرگەۋ دەپارتامەنتىنە شاقىرىلعانىن ايتقان. سول كەزەڭدە ولار ءجيى سويلەسكەن.
سوتتاعى سۇراقتارعا جاۋاپ بەرگەن جولشىبەكوۆ بۇرىنعى ايتقاندارىن ناقتى ەسىنە تۇسىرە المايتىنىن، ءبىراق ولاردان باس تارتپايتىنىن مالىمدەدى.
ال Justking اتىمەن تانىمال بلوگەر نۇربەك نۇرتازا سوتتا مۇنداي اڭگىمەلەر بولماعانىن ايتتى. ونىڭ سوزىنشە، ءجانابىلوۆتار ودان ۇتىس ويىندارىنا قاتىستى جازا نەمەسە زاڭدىق سالدارلار جايلى سۇراماعان.
سوت بارىسىندا بلوگەرلەر اراسىنداعى قارىم-قاتىناس پەن ىقتيمال كەلىسپەۋشىلىكتەر دە ءسوز بولدى. ايىپتالۋشىلاردىڭ ادۆوكاتى گاۋحار ايتجانوۆانىڭ سۇراقتارىنا جاۋاپ بەرگەن جولشىبەكوۆ ءجانابىلوۆتاردى التى جىلدان استام ۋاقىتتان بەرى تانيتىنىن ايتتى.
ول ايىپتالۋشىلارعا دەگەن جەكە وكپەسى جوق ەكەنىن جەتكىزدى. دەگەنمەن ەربولات جانابىلوۆپەن كەيدە كەلىسپەۋشىلىكتەر بولعانىن جاسىرمادى.
«تولەگەنوۆامەن ونداي بولعان جوق، ال ەرامەن (ەربولات ءجانابىلوۆ – رەد.) كەيدە بولىپ تۇراتىن. ەر ادامدار اراسىندا ونداي بولادى»، – دەدى ول.
ادۆوكات سونداي-اق 2025 جىلعى 29 ناۋرىزدا بولعان جانجال تۋرالى دا سۇرادى. بۇل جاعداي الەۋمەتتىك جەلىلەردە جاريالانعان. كۋاگەر بۇل وقيعانىڭ بولعانىن راستادى.
