Naǵyz ustaz bolý – baqyt ári abyroı. Shyndyǵynda, muǵalim bolý ońaı bolyp kóringenmen , al naǵyz ustaz bolý ekiniń biriniń qolynan kele bermesi anyq. "Ustazdy altyn dińgekke teńer edim" – dep uly pedagog Y.Altynsarın aıtqandaı, ustaz joly qıynshylyǵy men rahaty kóp mamandyq ataýlynyń ulysy. Ustazdyq etý tynbaı jumys isteý, óz ýaqytyn aıamaı, ózgeniń baqytyn aıalaý. Óz shákirtterin bilimniń shýaǵymen nárlendirip otyryp adamgershilik qasıetin, meıirim shýaǵyn bolashaq urpaqtyń boıyna darytý.
Ustazdyq qyzmeti árqashan kúrdeli degenmen,ustazdarǵa shákirtterdiń qurmeti erekshe.Bizde óz tarapymyzdan,ustaz degen uly atty qadirlep «Ustaz aty-bıik,ári máńgilik» atty is-shara ótkizdik.İs-shara BUU-nyń turaqty damý maqsattary 4 baǵyty aıasynda ótkizildi.İs-shara barysynda profesorlar quramy men oqytýshylardyń tarapyna jyly lebiz bildirip,qurmet kórsettik. Ustaz -jaratylysynan ózine aıtylǵannyń bárin jete túsingen, kórgen, estigen jáne ańǵarǵan nárselerdiń bárin jadynda jaqsy saqtaıtyn, eshnárseni umytpaıtyn alǵyr da ańǵarympaz aqyl ıesi!
«Eskiden qol úzip, jańaǵa qol jetkizgender ǵana muǵalim bola alady» dep qytaıdyń dana oıshyly Konfýsıı aıtqandaı, ıaǵnı muǵalim ótken tájirıbesin jańamen ushtastyra alatyn, kásibı qyzyǵýshylyǵy joǵary, tanymy bıik, bastaǵan isiniń nátıjesin kóre alatyn, ǵylymı zertteý jumystaryn tańdaı biletin, pedagogıkalyq úrdistiń zańdylyqtarymen etene tanys, oqytýdyń ádistemelik jańalyqtarynan habardar, oqytý úrdisin izdenimpazdyqpen arttyratyn óz isiniń sheberi bolýy kerek.
El táýelsizdigin qalpyna keltirgen alǵashqy otyz jylda, ustaz qaýymnyń mártebesi tómendep ketkeni san márte aıtyldy. Reformadan kóz ashpaǵan bir sala bolsa, ol da bilim salasy.
Degenmen sońǵy eki-úsh jyldyń ishinde muǵalimderdiń abyroıy kóterilip, mártebesi de óse bastady. Pedagogıkalyq mamandyqtyń bási joǵarylady. Týrasy – burynǵydaı mektep bitirýshiler endi tómengi balmen bul salaǵa túse almaıdy. Birtindep muǵalim degen mamandyq mártebeli mamandyqqa aınala bastady.
Bul óte durys saıasat ekendigin atap aıtqan abzal. Qazirgi zamandaǵy eń aldyńǵy qatarly elderdiń barlyǵy derlik ǵylym-bilim arqyly damyǵany daý týǵyzbaıdy. Urpaq bolashaǵy, halqymyzdyń keleshegi qazirgi ustazdardyń qolynda. Urpaqqa tárbıe berý, bilim nárimen sýsyndatý – ekiniń biriniń qolynan da kele bermeıdi. Sondyqtan, ustaz bolý – júrektiń batyrlyǵy dep baǵalaýǵa bolady.
Bıskýltanova Albına
ál-Farabı atyndaǵy Qazaq ulttyq ýnıversıtetiniń zań fakúlteti Memleket jáne quqyq teorıasy men tarıhy,konstıtýsıalyq jáne ákimshilik quqyq kafedrasynyń aǵa oqytýshysy
