5 jeltoqsanda "Dala Qyrandary" jastar qoǵamdyq birlestiginiń shtabynda Qazaqstan Respýblikasy Ishki ister ministriniń birinshi orynbasary Baýyrjan Tólegenuly Álenovpen jáne QR IIM Profilaktikalyq qyzmetti úilestirý komitetiniń tóraǵasy Arman Amangeldiuly Sadanovpen jumys kezdesýi ótti, dep habarlaidy Dalanews.kz.
Kezdesýdiń negizgi taqyryby – "Dala Qyrandary" usynǵan ózara is-qimyldy retteitin birlesken memorandým ázirleý bastamasy. Bul qujat qozǵalyspen IIM arasyndaǵy áriptestikti resmi túrde bekitip, yntymaqtastyqty júieli jáne uzaq merzimdi deńgeige shyǵarýǵa múmkindik beredi.
Bul vizit Dala Camp 2025: "Zań jáne tártip" forýmynda bastalǵan ózara yntymaqtastyqtyń zańdy jalǵasy boldy. Sol kezdesýde IIM ókilderi pikir almasýǵa qatysyp, shtab jumysymen jaqynyraq tanysý týraly usynysty qabyldaǵan edi.
Kezdesý barysynda taraptar jastarmen jumys, quqyqbuzýshylyqtyń aldyn alý jáne birlesken bastamalardy damytý múmkindikterin talqylady. "Dala Qyrandary" bolashaq seriktestikti júieli arnaǵa túsiretin ózara yntymaqtastyq týraly memorandým ázirleý bastamasyn usyndy. Bul qujat birlesken jumystyń naqty baǵyttaryn aiqyndap, ortaq kúsh-jigerdi tiimdi úilestirýge múmkindik beredi.
Ishki ister ministriniń birinshi orynbasary Baýyrjan Alenov vedomstvonyń qozǵalyspen birlesip jumys isteýge tolyq daiyn ekenin aita kelip:
"Ishki ister ministrligi sizderdiń kez kelgen bastamalaryńyzdy qoldaýǵa ázir. Biz sizderdiń jigerlerińizdi, talaptylyqtaryńyzdy jáne jaýapkershilikterińizdi joǵary baǵalaimyz. "Dala Qyrandary" qozǵalysymen seriktestik ornatyp, ortaq jobalardy damytý – bizdiń ortaq múddemiz. Árqaisyńyz – elimizdiń erteńisizder. Sondyqtan sizderdiń bilimdi, bedeldi, ózine senimdi azamat bolyp qalyptasýlaryńyz biz úshin mańyzdy", — dep atap ótti.
Sondai-aq ol bilim men damýdyń mańyzy týraly eske saldy.
"Oqý eshqashan ońai bolǵan emes, biraq bul Jaratqannyń sizderge bergen altyn ýaqyty. Dál osy kezeńde búkil ómirińizge qajet bolatyn bilim jinalady. Osy jiǵan qoryńyz erteńgi jolyńyzda senimdi tirek bolady. Esińizde bolsyn, máseleni aldyn alǵan onyń saldarymen kúreskennen áldeqaida jeńil. Sizder qazirdiń ózinde óz ustanymdaryńyzben, ómirge degen kózqarastaryńyzben ózgege úlgi bolyp profilaktikamen ainalysyp júrsizder", - dep qosty ol.
Profilaktikalyq qyzmetti úilestirý komitetiniń tóraǵasy Arman Sadanov shtabtaǵy atmosferaǵa erekshe toqtaldy.
"Mundaǵy tártip pen uiymdasqan jumysqa erekshe riza bolyp otyrmyn. Jinaqylyq, tártip jáne bir-birine degen qurmet bar. "Dala Qyrandary" - naǵyz kóshbasshylar qalyptasatyn orta", — dedi ol.
Sondai-aq ol ziiandy ádetterdiń saldaryna nazar aýdardy.
"Bes myń teńgeni alkogolge jumsaý aqyrynda qaiǵyly jaǵdaiǵa ákelýi múmkin. Munda jaǵdaida qandai paida týraly aitýǵa bolady? Biz sizderdiń sýrrogat alkogol ónimderiniń satylýyn anyqtaý boiynsha reidterdi júieli túrde ótkizip júrgenderińizdi bilemiz. Bul — óte mańyzdy jumys. Jaraisyzdar, biz sizderdi qoldaimyz", — dep atap ótti.
"Dala Qyrandary" tarapynan Nurǵali Tursyngaziev IIM qoldaýynyń mańyzdy ekenin atap ótti:
"Biz úshin Ministrliktiń jastardy tartyp, barynsha qoldap, yntymaqtastyqqa ashyq bolǵany óte mańyzdy. "Dala Qyrandary" shtaby — ideialardyń naqty bastamalarǵa ainalatyn orny. Biz IIM memorandým jasaý men birlesken dóńgelek ústel uiymdastyrý usynysyn qoldaǵanyna qýanyshtymyz", — dedi ol.
Óńirlerdegi jergilikti jumystyń máselesi de qozǵaldy: Qosshydaǵy Abdýlla esimdi qozǵalys belsendisi politsiia shaqyrtýlarǵa kesh jetetinin atap ótti. IIM ókilderi bul máseleni muqiiat qarastyratynyn jetkizdi.
Kezdesý qorytyndysy boiynsha taraptar dóńgelek ústel ótkizýge kelisip, onda memorandýmnyń naqty tustary aiqyndalatynyn jáne jastardyń qaýipsizdigi men áleýetin arttyrýǵa arnalǵan jańa bastamalar ázirlenetinin jetkizdi.
