Eýroodaqty taratyp, múshe elderge tolyq egemendik qaıtarý qajet. Mundaı pikirdi X áleýmettik jelisinde mıllıarder Ilon Mask aıtty, dep habarlaıdy Dalanews.kz.

Onyń sózinshe, «úkimetter óz halyqtarynyń múddesin jaqsyraq qorǵaı alýy úshin» EO-ny joıý kerek. Taǵy bir jazbasynda kásipker «Eýroodaqtyń búrokratıalyq júıesi Eýropany baıaý tunshyqtyryp jatyr» dep syn aıtty.

Mask buǵan deıin de EO jumysyna jıi kúmán keltirip, múshe memleketterge birlestikten shyǵýdy usynǵan. Al bul jolǵy pikirtalas Eýrokomıssıanyń X kompanıasyna €120 mln aıyppul salýynan týyndady. Aıyppul sıfrlyq qyzmetter týraly zań (Digital Services Act, DSA) talaptarynyń oryndalmaýyna baılanysty kesilgen.

Eýroodaq bıliginiń qorytyndysyna sáıkes, X áleýmettik jelisi dástúrli túrde resmı akkaýnttardy rastaýǵa arnalǵan «kók belgi» júıesin durys uıymdastyrmaǵan. Qoldanýshylar bul belgini satyp ala alady, al bul óz kezeginde basqa adamdardy shatastyrýy múmkin. Sonymen qatar, servıstiń jarnamalyq málimetterdi ashyq jarıalamaýy jáne ortaq derekterge retteýshilerge qoljetimdilik bermeýi zańbuzýshylyq retinde kórsetildi.