Abai oblysynyń ákimi Berik Ýáli Qytai investorlaryna qarsy baǵyttalǵan áreketter zańsyz ekenin aitty, dep habarlaidy Dalanews.kz.
Jýrnalist Jomart Jumageldin taratqan videoda ákim Qytaidan “qorqý” nemese olardy qoǵamdyq jaý retinde kórsetý el múddesine qaishy áreket ekenin atap ótedi.
“Qytaidan qorqatyn bolsaq, onda jerdi tastap Aiǵa nemese Marsqa kóship keteiik. Qytai azamattaryna “nege qazaqsha sóilemeisiń” dep tiisý - zańsyz. Erteń ondai adamdar sottalady. Halyqty shatastyryp, qytailarǵa qarsy qoiýǵa bolmaidy. Kerisinshe, sizder sol qytailarǵa kómektesýlerińiz kerek. Mysaly, olardy uryp-soǵyp, keshe TikTok-ta videoǵa túsken eki adam qamaýǵa alyndy”, - deidi ol.
Ákim sheteldik kompaniialardyń óńirge kelýi óndiristik jobalardyń iske asýyna jol ashatynyn jetkizdi.
“Búkil álem Qytaidyń investitsiiasyna zárý, sol úshin talasyp jatyr. Biz kórshi turǵan Qytaidan investitsiia tartpasaq, aqsha izdep endi Italiiaǵa baramyz ba?! Sondyqtan qytailyq kompaniialar kelip jatsa, olar bosqa kelip otyrǵan joq. Olar bizdiń jolymyzdy salaiyn dep jatyr. Eger olardyń talaptaryna sai jumys istei alsaq, jergilikti mamandardy nege tartpasqa? Árine, tartamyz. Biraq negizgi tehnikalyq mamandar - qytailyqtar, al diplomy joq jergilikti azamattar qara jumysqa alynýy múmkin. Eger halyqtyń bilimi bolsa, olardy da negizgi jumysqa qabyldaimyz”, - dep qosty ol.
Sonymen qatar Berik Ýáli temirjol qurylysy jobasyna qatysty pikir bildirip, birneshe jyl boiy júzege aspaǵan jobany Qytai tarapymen iske asyrý múmkindigi paida bolǵanyn atap ótti.
“Qytaida aqsha bar. Biz bul temirjoldy talai jyl salamyz dedik, biraq eshkim kirispedi. Endi sony qytailarǵa saldyrmaqpyz. Qaita Memleket basshysy men Si Tszinpinge raqmet, eki el arasyndaǵy barys-kelis úshin vizasyz rejim engizildi”, — dedi ol.
