Elimizde 9 shilde – Sý sharýashylyǵy qyzmetkerleri kúni, al 10 shilde Veterinariialyq qyzmetkerleri kúni bolyp bekitilgen. Osyǵan orai Túrkistan oblysynda qos kásibi merekege arnalǵan is-shara ótip, eńbek adamdaryna qurmet kórsetildi. Aldymen oblys ákimi Nuralhan Kósherov veterinariia salasynyń ókilderine zaman talabyna sai jabdyqtalǵan jańa tehnikalardyń kiltin tapsyryp, jumystaryna sáttilik tiledi. Jalpy, biyl 85 kólik tabystalyp otyr,- dep habarlaidy Dalanews.kz
Odan keiin oblys ákimi saltanatty jiynǵa qatysyp, sala mamandaryn quttyqtady.
– Qurmetti sý sharýashylyǵy jáne veterinariia salasynyń qyzmetkerleri! Ardaqty eńbek ardagerleri! Sizderdi kásibi merekelerińizben shyn júrekten quttyqtaimyn! Memleket basshysy Qasym-Jomart Kemelulynyń bastamasymen 2025 jyl «Jumysshy mamandyqtar jyly» dep jariialandy. Sizder sekildi eńbek adamdarynyń bedelin arttyrý, qoǵamǵa úlgi etý – dástúrge ainalyp jatyr. Búgingi basqosýymyz da – osynyń dáleli. Túrkistan óńiri – agroónerkásiptik keshen boiynsha respýblikada kóshbasshy ólke. Elimizdegi jalpy ónim kóleminiń 13 paiyzy bizdiń oblysqa tiesili. Jylyna 1 trln teńgeden astam qarjynyń ónimi óndiriledi. Sý tapshylyǵynyń aldyn alý baǵytynda birqatar aýqymdy jumystar júrgizilýde. Biyl 46 myń gektarǵa sý únemdeý tehnologiialary engizildi. Nátijesinde aǵyn sýdy 1,5-2 esege únemdeýmen qatar, ónimdilikti 2,5-3 esege arttyrýǵa qol jetkizilýde. Bul rette sý sharýashylyǵy mamandarynyń eńbegi airyqsha. Al veterinariia salasyna kelsek, indetterdiń aldyn alý, aýyl sharýashylyǵy ónimderiniń sapasyn arttyrý baǵytynda ilkimdi ister atqarylýda. «Veterinariia adamzatty emdeidi» degen qanatty sóz eshqashan ózektiligin joǵaltqan emes. Sebebi sala qyzmetkerleriniń qajyrly eńbeginiń arqasynda indetterdiń aldyn alý, aýyl sharýashylyǵy ónimderiniń sapasyn arttyrý baǵytynda júieli jumystar júrgizilýde. Qaýipti indetter men ziiankesterge qarsy kúres barysyndaǵy belsendi qyzmetterińizge alǵys bildiremin. Tól merekelerińizben taǵy da quttyqtai kele, zor densaýlyq, eńbekte tabys, el igiligi jolyndaǵy qyzmetterińizge sáttilik tileimin! – degen Nuralhan Kósherov úzdik sý mamandary men veterinariia ókilderine marapattardy tabystady.
Is-sharada kásibi mereke ieleri QR Prezidentiniń III dárejeli «Eńbek dańqy» ordeni, «Eren eńbegi úshin» tósbelgisi, QR Aýyl sharýashylyǵy ministrliginiń «Eńbek ardageri» medali, «Aýyl sharýashylyǵynyń úzdigi» tósbelgisi, QR aýyl sharýashylyǵy ministrliginiń «Qurmet gramotasy», QR Sý resýrstary jáne irrigatsiia ministrliginiń «Qurmet gramotasy», Túrkistan oblysy ákimdigi jáne oblystyq máslihatynyń «Qurmet gramotasy», Gramotasyna jáne Alǵys hattaryna, sondai-aq ózge de marapattarǵa ie boldy. Saltanatty jiyn kontserttik baǵdarlamaǵa ulasty.
Aita keteiik, Túrkistan oblysynda sý sharýashylyǵy salasynda aýqymdy jumystar atqarylýda. Óńirde sý únemdeý tehnologiialary keńinen engizilip jatyr. Kóktemgi tasqyn sýlardy ustap, sýarý maýsymyna tiimdi paidalaný úshin «Báidibek ata» jáne «Boraldai» sý qoimalary salynýda. Sý nysandaryn «Islam damý banki» qarjysyn tartý esebinen qalpyna keltirý josparlanyp otyr. Jalpy 25 sý qoima, 1 sý rettegish, 269 kanaldy kúrdeli jóndeýden ótkizý arqyly sý nysandarynyń tozý kórsetkishin 76%-dan 50%-ǵa tómendetý kózdelýde.
