Soltústik Qazaqstan oblysynyń Aıyrtaý aýdanynda sýblımasıalanǵan qurǵaq bıe sútin óndiretin jańa kásiporyn jumysyn bastady, dep habarlaıdy Dalanews.kz.
Joba «Sever Agro LTD» JSHS-men agroónerkásiptik keshendi nesıeleý baǵdarlamasy aıasynda memlekettik qoldaý arqyly júzege asyryldy. Investısıa kólemi 3 mlrd teńgeden asty.
Kásiporyn kompanıanyń óz fermasy bazasynda salynǵan. Óndiristik keshen quramyna bıe ustaýǵa jáne saýýǵa arnalǵan alańdar, 20 myń gektardan asatyn jaıylymdyq jerler, sondaı-aq sýblımasıalyq keptirý jelilerimen jabdyqtalǵan seh kiredi. Kásiporynda 30 jańa jumys orny ashyldy.
Óndiris tehnologıasy nemis sharýasy ári kásipkeri Gans Solman ázirlegen tereń sýblımasıa ádisine negizdelgen. Onyń sharýashylyǵy 1970 jyldardan beri jylqy ósirýmen aınalysady, al 1990 jyly bıe sútin osy ádispen óńdegen alǵashqy ónerkásiptik tájirıbe júrgizilgen. Múlben qalasyndaǵy Solman fermasy Germanıadaǵy qymyz óndirýge mamandanǵan eń iri jáne eń kóne kásiporyndardyń biri bolyp sanalady. Sarapshy jabdyqty ornatý, iske qosý jáne qazaqstandyq mamandardy oqytý jumystaryn ózi baqylaǵan.
Saýmaldy –55 °C temperatýrada muzdatyp, keıin ylǵaldy suıyq kúıge ótpesten bólý prosesi ónimniń tabıǵı quramyn — albýmındi aqýyzdar, ımmýnoglobýlınder, dárýmender, fermentter men polıqanyqpaǵan maı qyshqyldaryn — barynsha saqtaýǵa múmkindik beredi. Osy ádis arqyly ónimniń saqtaý merzimi eki jylǵa deıin uzartylady.
Zaýyttyń jyldyq óndiristik qýaty 40 tonnaǵa deıin jetedi. Saýmal birneshe formatta shyǵarylady: untaq, jeke salynǵan sashe jáne kapsýla túrinde — saqtaý men paıdalanýǵa qolaıly nusqalar.
«Sever Agro LTD» dırektory Erbýlat Kalenov jańa kásiporyn óńirdegi aýyl sharýashylyǵy shıkizatyn tereń óńdeý áleýetin keńeıtetinin atap ótti.
«Sýblımasıalanǵan bıe súti — mamandandyrylǵan tamaqtaný salasynan bastap, azyq-túlik óndirisiniń jekelegen baǵyttaryna deıin keń qoldanylatyn ónim. Biz ishki naryqty qamtamasyz etýmen qatar, Qytaı men Eýropa elderine eksportty da josparlap otyrmyz. Zaýyttyń iske qosylýy óńdelgen ónim túrlerin kóbeıtip, óńirdiń agroónerkásiptik sektordaǵy múmkindikterin nyǵaıtady», — dedi ol.
Aıta keteıik, 2023 jyly qyrkúıek aıynda Qostanaı oblysynda jylyna 40 tonnaǵa deıin ónim óndiretin «Local Food» brendimen bıe sútin keptirý fermasy iske qosylǵan bolatyn.
