سولتۇستىك قازاقستان وبلىسىنىڭ ايىرتاۋ اۋدانىندا سۋبليماسيالانعان قۇرعاق بيە ءسۇتىن وندىرەتىن جاڭا كاسىپورىن جۇمىسىن باستادى، دەپ حابارلايدى Dalanews.kz.

جوبا «Sever Agro LTD» جشس-مەن اگروونەركاسىپتىك كەشەندى نەسيەلەۋ باعدارلاماسى اياسىندا مەملەكەتتىك قولداۋ ارقىلى جۇزەگە اسىرىلدى. ينۆەستيسيا كولەمى 3 ملرد تەڭگەدەن استى.

كاسىپورىن كومپانيانىڭ ءوز فەرماسى بازاسىندا سالىنعان. وندىرىستىك كەشەن قۇرامىنا بيە ۇستاۋعا جانە ساۋۋعا ارنالعان الاڭدار، 20 مىڭ گەكتاردان اساتىن جايىلىمدىق جەرلەر، سونداي-اق سۋبليماسيالىق كەپتىرۋ جەلىلەرىمەن جابدىقتالعان سەح كىرەدى. كاسىپورىندا 30 جاڭا جۇمىس ورنى اشىلدى.

ءوندىرىس تەحنولوگياسى نەمىس شارۋاسى ءارى كاسىپكەرى گانس سولمان ازىرلەگەن تەرەڭ سۋبليماسيا ادىسىنە نەگىزدەلگەن. ونىڭ شارۋاشىلىعى 1970 جىلداردان بەرى جىلقى وسىرۋمەن اينالىسادى، ال 1990 جىلى بيە ءسۇتىن وسى ادىسپەن وڭدەگەن العاشقى ونەركاسىپتىك تاجىريبە جۇرگىزىلگەن. ميۋلبەن قالاسىنداعى سولمان فەرماسى گەرمانياداعى قىمىز وندىرۋگە ماماندانعان ەڭ ءىرى جانە ەڭ كونە كاسىپورىنداردىڭ ءبىرى بولىپ سانالادى. ساراپشى جابدىقتى ورناتۋ، ىسكە قوسۋ جانە قازاقستاندىق مامانداردى وقىتۋ جۇمىستارىن ءوزى باقىلاعان.

ساۋمالدى –55 °C تەمپەراتۋرادا مۇزداتىپ، كەيىن ىلعالدى سۇيىق كۇيگە وتپەستەن ءبولۋ پروسەسى ءونىمنىڭ تابيعي قۇرامىن — ءالبۋميندى اقۋىزدار، يممۋنوگلوبۋليندەر، دارۋمەندەر، فەرمەنتتەر مەن پوليقانىقپاعان ماي قىشقىلدارىن — بارىنشا ساقتاۋعا مۇمكىندىك بەرەدى. وسى ءادىس ارقىلى ءونىمنىڭ ساقتاۋ مەرزىمى ەكى جىلعا دەيىن ۇزارتىلادى.

زاۋىتتىڭ جىلدىق وندىرىستىك قۋاتى 40 تونناعا دەيىن جەتەدى. ساۋمال بىرنەشە فورماتتا شىعارىلادى: ۇنتاق، جەكە سالىنعان ساشە جانە كاپسۋلا تۇرىندە — ساقتاۋ مەن پايدالانۋعا قولايلى نۇسقالار.

«Sever Agro LTD» ديرەكتورى ەربۋلات كالەنوۆ جاڭا كاسىپورىن وڭىردەگى اۋىل شارۋاشىلىعى شيكىزاتىن تەرەڭ وڭدەۋ الەۋەتىن كەڭەيتەتىنىن اتاپ ءوتتى.

«سۋبليماسيالانعان بيە ءسۇتى — مامانداندىرىلعان تاماقتانۋ سالاسىنان باستاپ، ازىق-تۇلىك ءوندىرىسىنىڭ جەكەلەگەن باعىتتارىنا دەيىن كەڭ قولدانىلاتىن ءونىم. ءبىز ىشكى نارىقتى قامتاماسىز ەتۋمەن قاتار، جۇڭگو مەن ەۋروپا ەلدەرىنە ەكسپورتتى دا جوسپارلاپ وتىرمىز. زاۋىتتىڭ ىسكە قوسىلۋى وڭدەلگەن ءونىم تۇرلەرىن كوبەيتىپ، ءوڭىردىڭ اگروونەركاسىپتىك سەكتورداعى مۇمكىندىكتەرىن نىعايتادى»، — دەدى ول.

ايتا كەتەيىك، 2023 جىلى قىركۇيەك ايىندا قوستاناي وبلىسىندا جىلىنا 40 تونناعا دەيىن ءونىم وندىرەتىن «Local Food» برەندىمەن بيە ءسۇتىن كەپتىرۋ فەرماسى ىسكە قوسىلعان بولاتىن.