Keiingi ýaqytta álemniń birneshe elinde áýe qaýipsizdigine qatysty birqatar tótenshe jaǵdai tirkeldi. Bul oqiǵalar áýe tasymaly salasynda qaýipsizdik máselesiniń ózektiligin taǵy bir márte alǵa shyǵaryp otyr. Dalanews.kz sońǵy kúnderi jáne ótken aida bolǵan áýe apattaryn jinaqtap, hronologiialyq sholý usynady.
Braziliiadaǵy apat
Búgin, 5 jeltoqsanda Braziliianyń Gýarýliýs qalasyndaǵy áýejaida LATAM kompaniiasynyń Airbus A320 jolaýshylar ushaǵy otqa orandy.
Bortta júzden asa jolaýshy bolǵan. Portý-Alegrige baǵyt alǵan áýe kemesinde tútin anyqtalǵan boida qaýipsizdik hattamalary iske qosylyp, ekipaj jolaýshylardy jedel evakýatsiialady.
Adam shyǵyny týraly aqparat áli joq, al órttiń naqty sebebi tekserilip jatyr.
Máskeý – Phýket baǵytyndaǵy oqiǵa
Al 3 jeltoqsanda Máskeýden Phýketke ushyp shyqqan Redwings kompaniiasynyń Boeing-777 áýe kemesi kóterile bergende qozǵaltqyshynyń órtenýine bailanysty shuǵyl túrde Domodedovo áýejaiyna qaita qondy.
Ushaq bortynda 412 jolaýshy jáne 13 ekipaj múshesi bolǵan.
Órt ushqannan tórt minýttan keiin baiqalǵan. Ekipaj janarmaidy áýede jaǵyp, qaýipsiz qonýǵa jaǵdai jasaǵan. Apat sebebi tergelip jatyr.
Astana–Qostanai reisindegi jaǵdai
3 jeltoqsanda Qazaqstanda Astana – Qostanai baǵytyndaǵy FlyArystan kompaniiasynyń FS7341 reisi aýa raiynyń qolaisyzdyǵyna bailanysty keri qaitty.
Qostanaidaǵy qoiý tuman ushaqtyń qonýyna múmkindik bermegendikten, ekipaj qaýipsizdik talaptaryna sáikes Astanaǵa oralý týraly sheshim qabyldady. Jolaýshylarǵa tamaq pen sýsyn berilip, keiin aýa raiy jaqsarǵan soń reis qaita júzege asty.
Bul oqiǵa – tehnikalyq aqaýdan emes, meteorologiialyq sebepten bolǵan jaǵdai.
Buǵan deiingi oqiǵalar
Dýbaidaǵy aviashoý kezindegi jarylys
Buǵan deiin, 21 qarashada Dubai Airshow kórmesi kezinde Úndistan ÁÁK-niń Tejas joiǵysh ushaǵy kópshilik kózinshe qulap, jarylyp ketken edi.
Apat saldarynan kórermen arasynda dúrbeleń týyndap, aspandy birneshe minýt boiy qara tútin torlady.
Úndistan ÁÁK oqiǵany resmi túrde rastady. Qosymsha málimetter keiinirek usynylady dep habarlandy.
Túrkiianyń órt sóndirý ushaǵynyń Horvatiiada qulaýy
Jaqyn kúnderi bolǵan taǵy bir aýyr oqiǵa – Horvatiiadaǵy apat.
14 qarashada Horvatiia aýmaǵynda Túrkiianyń Aýyl jáne orman sharýashylyǵy ministrliginiń Basty orman basqarmasyna tiesili órt sóndirý ushaǵy qulady. Bul týraly ministr Ibragim Iýmakly habarlady.
Ushaq radardan joǵalyp ketip, onyń bólshekteri Sen qalasy mańynan tabylǵan. Apat saldarynan ushqysh qaza tapqan.
CNN Türk málimetinshe, áýe kemesi 5 myń fýt biikte qalyń bult qabatyna kirip, qolaisyz aýa raiyna tap bolǵan. Zagreb áýejaiyna qona almaǵan ekipaj baǵytyn ózgertýge májbúr bolypty.
Ministrlik ókilderi ushaqtyń Horvatiiaǵa tehnikalyq qyzmet kórsetýge bara jatqanyn málimdedi. Qaiǵyly oqiǵaǵa qatysty tergeý jalǵasyp jatyr.
AQSh-taǵy UPS júk ushaǵynyń qulaýy
5 qarashada AQSh-tyń Kentýkki shtatynda UPS kompaniiasyna tiesili MD-11 júk ushaǵy kóterilý kezinde sol jaq qozǵaltqyshy janyp, qanattan ajyrap qalǵan.
Apat saldarynan keminde 12 adam qaza tapty, birneshe adam jaraqat alǵan. Órt áýejaiǵa jaqyn ornalasqan ónerkásiptik aimaqqa da taralǵan.
AQSh-tyń Ulttyq kólik qaýipsizdigi keńesi (NTSB) bul oqiǵany sońǵy jyldardaǵy eń iri áýe apattarynyń biri dep atady.
