Gennadii Golovkin resmi túrde Halyqaralyq boks Dańq zalyna (International Boxing Hall of Fame) endi, dep habarlaidy Dalanews.kz.
Ol bul mártebege ie bolǵan alǵashqy qazaqstandyq atandy. Gennadii Golovkin Halyqaralyq boks Dańq zalyna alǵashqy múmkindiginde-aq qabyldandy.
Gennadii Golovkinniń áýesqoi bokstaǵy joly - orta salmaqtyń eń tabysty mansaptarynyń biri boldy. Ol 350 jekpe-jek ótkizip, 345-inde jeńiske jetken. Uzaq jyldar boiy Qazaqstan quramasynyń kóshbasshylarynyń biri retinde el mereiin ústem etti.
Kásipqoi boksqa ótken soń, Gennadii Golovkin orta salmaqtyń XXI ǵasyrda dúrkiregen chempiondarynyń birine ainaldy.
Kásipqoi ringte ol 45 kezdesý ótkizip, 42 ret jeńiske jetti (37-si nokaýtpen). Uzaq ýaqyt boiy P4P (pound-for-pound) reitinginiń kóshin bastady. Kásipqoi mansabynda WBA, WBC, IBF jáne IBO tujyrymdary boiynsha álem chempiony atanyp, The Ring jýrnalynyń bedeldi belbeýin ielendi.
2012 jyly HBO arnasymen kelisimshartqa qol qoiǵannan keiin Golovkin premiým-arnanyń basty juldyzyna ainaldy. Onyń jekpe-jekteri únemi úlken qyzyǵýshylyq týdyryp, nokaýtqa negizdelgen shabýylshy stili men orta salmaqtaǵy ústemdigi ony álemdik arenadaǵy mártebesin aishyqtai tústi.
Toǵyz jylǵa sozylǵan qatarynan 23 nokaýttan turatyn jeńisti joly - divizion tarihynda eń uzaq seriialardyń biri boldy. Sonymen qatar ol orta salmaqtaǵy chempiondyq belbeýlerin 21 ret sátti qorǵap, rekord jasady. 90 paiyzdan asatyn nokaýt kórsetkishi Ginnes rekordtar kitabynda álem chempiondary arasyndaǵy eń joǵary paiyzdardyń biri retinde tirkelgen. Bul kórsetkish te ony qazirgi bokstyń uly tulǵalarynyń biri ekenin aiqyndaidy.
Osy statistikanyń ar jaǵynda - jyldar boiǵy tártip, ishki kúsh-qýat, myqty jiger jáne uly sportshylardy daralaityn tabandylyq jatyr. Ár dál tigen soqqy onyń ulylyqqa bastar jolyndaǵy bir qadam boldy. Al onyń stili kásibi bokstyń úlgisine ainaldy.
Búginde Gennadii Golovkin el namysyn jańa deńgeide qorǵap júr. Qazirgi tańda ol basqarý salasynda eńbek etýde. Dańqty boksshy Qazaqstannyń Ulttyq Olimpiadalyq komitetin jáne World Boxing uiymyn basqarady. Osylaisha halyqaralyq sport uiymyna jetekshilik etken alǵashqy qazaqstandyq atandy.
Onyń Halyqaralyq boks Dańq zalyna enýi - tek jetistikteri úshin marapat emes, álemdik bokstyń tarihynda tereń iz qaldyrǵan ári sharshy alańnan tys jerde de sporttyń damýyna yqpal etip kele jatqan tulǵanyń eńbegin baǵalaý.
Gennadii Golovkinniń esimi endi álemdik boks tarihyn qalyptastyrǵan uly tulǵalardyń qatarynda resmi túrde atalatyn boldy.
Ár jyldary bul qatarǵa Muhammed Áli, Maik Taison, Floid Meivezer jáne Menni Pakiao syndy dańqty sportshylar engen.
