Túrkistan oblysynda mediatsiia kúnine orai ashyq esik kúni ótti
Oblysymyzdyń barlyq qala, aýdandarynda ótken is-shara aiasynda óńir turǵyndaryna quqyqtyq keńester berilip, daýlasýshy taraptar mámilege shaqyryldy. Osy kúni oblystyq assambleia Túrkistan qalasynda «Mediatsiia – tatýlyq bastaýy» taqyrybynda dóńgelek ústel uiymdastyrdy. Jiynǵa sot qyzmetkerleri jáne kásibi mediatorlar, memlekettik mekeme qyzmetkerleri, etnomádeni birlestik tóraǵalary, qoǵamdyq kelisim keńesiniń tóraǵalary qatysyp, óńirde mediatsiia isin ilgeriletý jaiyn talqylady.
– Qazaq halqy úshin bitimgershilik – bilik aitýdyń eń ozyq ónegesi. Bilerimiz kez kelgen daýdy kelisimmen sheshe bilgendigin tarihtan bilemiz. Búgingi mediatsiia – ata-babalarymyzdyń mámilegerlik dástúriniń jalǵasy deýge bolady. Respýblikalyq aktsiia aiasynda ótip jatqan búgingi is-shara eldiń birligin nyǵaityp, qoǵamdyq kelisimdi saqtaýǵa baǵyttalǵan, – dedi jiynda sóz alǵan, oblystyq «Qoǵamdyq kelisim» KMM janyndaǵy mediatsiia kabinetiniń meńgerýshisi Hasan Batsiev.
Aita ketý kerek, búginde oblystyq Qazaqstan halqy Assambleiasy jáne qala, aýdan ákimdikteri janynda 10 mediatsiia kabineti jumys isteidi. Óńirimizde 67 kásibi, 387 kásibi emes mediatordyń tizimi jasaqtalyp, midiatsiia jelisin damytý baǵytynda osy jyly 90 is-shara uiymdastyrylǵan. Jyl basynan beri 1900-den astam daýlar mediatsiia tártibimen oń sheshimin tapqan.
