Keiingi jyldary Qazaqstanda jer qatynastary salasynda ashyqtyq pen ekologiialyq jaýapkershilik deńgeii aitarlyqtai artyp keledi. Bul týraly jer qatynastary jónindegi maman Arman Ótepov Dalanews.kz tilshisine bergen suhbatynda aitty. Onyń sózinshe, jerdi tiimdi paidalaný men tsifrlandyrý baǵytyndaǵy jańa qadamdar eldiń ekonomikalyq jáne ekologiialyq turaqtylyǵyna tikelei áser etip otyr.
"Qazirgi ýaqytta "Azamattarǵa arnalǵan úkimet" memlekettik korporatsiiasy arqyly jańa tsifrlyq kadastr júiesi jasalyp jatyr. Bul joba jer týraly barlyq derekti biryńǵai bazaǵa biriktirýge múmkindik beredi. Buryn ár vedomstvo óz derekterin jeke júrgizgendikten, koordinattar men kartografiialyq málimetterde sáikessizdik kóp bolatyn. Endi biryńǵai standart engizý arqyly osy másele sheshilmek", – deidi sarapshy.
Ótepovtiń aitýynsha, jer kadastryn tsifrlandyrý tek aqparatty jinaqtaý emes, sonymen birge jerdiń tiimdi paidalanylýyn baǵalaityn quralǵa ainalýy qajet.
"Búginde jer qatynastary salasynda ýnifikatsiia, iaǵni birizdendirilgen standarttar engizilip jatyr. Bul orman, aýyl sharýashylyǵy jáne sý resýrstary júieleriniń kartografiialyq bazalaryn ózara sáikestendirýge jol ashady. Bolashaqta bul júielerdiń barlyǵy integratsiialanyp, josparlaý men jer paidalanýda birtutas tásil qalyptasady. Sebebi jerdi tiimdi paidalaný - tek sharýanyń múddesi emes, ekologiialyq qaýipsizdik máselesi. Topyraqtyń tozýy, sý resýrstarynyń azaiýy jáne klimattyń ózgerýi bári jerge nemquraily qaraýdan bastalady", – deidi Ótepov.
Sarapshynyń pikirinshe, qazirgi reformalar aýyl sharýashylyǵyn ekologiialyq turǵydan jaýapty etýge baǵyttalǵan.
"Mysaly, bir aimaqta egistik alqaptaryn josparlaý kezinde sýdyń jetkiliktiligi, jerdiń qunarlylyǵy, topyraq tozýy siiaqty faktorlar nazarǵa alynýy qajet. Eger bir jerde jyl saiyn bir ǵana daqyl – mysaly, bidai egilse, ol jerdiń tabiǵi tepe-teńdigi buzylady", - deidi ol.
Arman Ótepov sondai-aq jer óńdeý mádenietin jetildirýdiń mańyzdylyǵyna toqtaldy.
"Álemde "No-till", "chizel", "mýlchirovanie" siiaqty jerdi tozdyrmai óńdeý ádisteri keńinen qoldanylady. Bul – topyraqtaǵy ylǵaldy saqtaý men qunarlylyǵyn arttyrýdyń tiimdi joly. Qazaqstan da osy tájiribelerdi kezeń-kezeńimen engizip jatyr. Munyń paidasyn aldaǵy birneshe jylda kóremiz", – deidi ol.
Onyń aitýynsha, jer resýrstaryn basqarý tek ekonomikalyq múdde emes, strategiialyq ekologiialyq saiasattyń mańyzdy bóligi bolýy tiis.
"Jer – tirshilik tiregi. Ony durys basqarý – bolashaq urpaq aldyndaǵy jaýapkershilik", – dep qorytyndylady sarapshy.
