29 qazanda Qaraǵandy oblysy ákimdigi halyqaralyq «Qazaq tili qoǵamy» birlestigi jáne Qaztutynýodaǵy Qaraǵandy ýniversiteti arasynda ózara yntymaqtastyq týraly memorandýmǵa qol qoidy, dep habarlaidy Dalanews.kz
Eki uiym memleket basshysy Qasym-Jomart Toqaevtyń azamattyq sanany oiatyp, kitap oqý mádenietin damytý tapsyrmalaryn oryndaý maqsatynda oblysta bastaý alǵan «Tulpar minip, tý alǵan» baiqaýyna qoldaý bildirdi.
Bul bastama – memleket, qoǵam jáne bilim ordalarynyń ortaq muraty men yntymaǵyn aiqyndaityn mańyzdy qadam. Baiqaý jeńimpazy Qaztutynýodaǵy Qaraǵandy ýniversitetiniń bilim grantyn ielense, ustazy — «Halyqaralyq Qazaq tili qoǵamy» usynǵan avtokólikke ie bolady. Mundai qoldaý oqýshylardyń bilimge, kitap oqýǵa degen qyzyǵýshylyǵyn arttyryp, shákirtin jetistikke jetelegen muǵalimderge de erekshe shabyt syilaidy.
Baiqaýǵa oblystyń 13 óńirinen 4 138 oqýshy qatysýǵa ótinim bergen. Jarys eki kezeńnen turady:
- I kezeń — aýdandyq / qalalyq,
- II kezeń — oblystyq.
Baiqaýdyń basty maqsaty — memlekettik tildiń mártebesin arttyrý, ulttyq qundylyqtardy, qazaq halqynyń salt-dástúri men rýhani murasyn dáripteý.
Is-sharaǵa Qaraǵandy oblysy ákiminiń orynbasary Álibek Áldenei, «Halyqaralyq Qazaq tili qoǵamynyń» prezidenti Raýan Kenjehanuly jáne Qaztutynýodaǵy Qaraǵandy ýniversiteti rektorynyń mindetin atqarýshy Almas Orynbekov qatysty.
Memorandýmǵa qol qoiý — Qaraǵandy oblysynda qazaq tilin damytý, jastardyń rýhani jáne mádeni tárbiesin kúsheitý jolyndaǵy mańyzdy qadam boldy.
Qatysýshylar memlekettik tildiń bedelin arttyrýǵa jáne ulttyq sana men rýhty jańǵyrtýǵa baǵyttalǵan birlesken bastamalardyń aldaǵy ýaqytta da jalǵasatynyn atap ótti.
