"QazMunaıGaz" ulttyq kompanıasy Mańǵystaý oblysyndaǵy "MunaıSpesSnab Kompanı" seriktestigi jumysshylarynyń ereýiline qatysty resmı pikir bildirdi, dep habarlaıdy Dalanews.kz.
Ulttyq kompanıanyń baspasóz qyzmeti ereýil aıaqtalǵanyn habarlady, al jumysshylar men jumys berýshi arasyndaǵy kelispeýshilikter sheshimin tapqan.
"29 qazanǵa qaraı "MunaıSpesSnab Kompanı" seriktestigindegi jaǵdaı tolyq retteldi, kásiporynnyń jumysy tolyq kólemde qalpyna keltirildi, qyzmetkerler jumys oryndaryna oraldy", – delingen "QazMunaıGaz" habarlamasynda.
Kompanıanyń málimetinshe, ereýilge shyqqan jumysshylar óz talaptaryn tikeleı merdiger kompanıa basshylyǵyna qoıǵan. Basshylyqpen kelissózderden keıin taraptar kelisimge kelgen, nátıjesinde qyzmetkerler jumysqa qaıta kiristi.
"QazMunaıGaz" baspasóz qyzmeti Jańaózendegi barlyq kásiporyndarda jaǵdaı turaqty ekenin de atap ótti.
