Prezident Toqaev Úkimetke áleýmettik sala boiynsha moinyna alǵan mindetterdi tolyqtai oryndaýyn udaiy qadaǵalaýmen boldy. Óz kezeginde atqarýshy bilik jaýapkershiligine alǵan mindettemelerdi tolyqtai júzege asyryp, halyqtyń áleýmettik jaǵdaiyn jaqsartýǵa bar kúsh-jigerin jumysaǵanyn da aitýǵa tiispiz.
Búgin Úkimettiń áleýmettik sala boiynsha 11 ai boiy atqarǵan jumystarynyń esebi jariialandy. Qolǵa tigen esepke kóz salǵanymyzda halyqtyń jumyspen qamtyý, kásipkerlikti damytý boiynsha kóptegen jumystar atqarylǵanyna baiqadyq. Endi sony tarqatyp aitsaq.
11 aidyń qorytyndysy boiynsha óńirlik jumyspen qamtý kartalary aiasynda 908,5 myń adam jumysqa ornalasypty, onyń ishinde 257,1 myń adam ulttyq jobalardy iske asyrý kezinde eki qolǵa bir kúrek tapsa, 294,3 myń azamat bos jumys oryndaryna jumysqa turypty. Al Memleket basshysynyń «10 myń turǵynǵa 100 jumys orny» bastamasy aiasynda 11 aida 357,1 myń adam jumyspen qamtylypty.
Búginde halyqty jumyspen qamtýdyń balamaly joldary da paida bolýda. Sonyń biri memleket sýbsidiialaityn jumys oryndary – bul baǵyt boiynsha biyl 196,3 myń adam jumysqa turǵan. Taǵyda aita tússek, halyqtyń áleýmettik osal toptarynan shyqqan azamattarǵa biznes ashý úshin 400 AEK (shamamen 1,3 mln teńge) mólsherinde 9,1 myń memlekettik grant berilgen. Osylaisha memlekettiń grantyna ie bolǵan azamattar is bastap, kásiperlik salaǵa bet burǵan.
Biyl Memleket basshysy Qasym-Jomart Toqaevtyń tikelei bastamasymen «Ulttyq qor – balalarǵa» bastamasy aiasynda ony oryndaý tetigi ázirlenip, qajetti zańnamalyq túzetýler qabyldandy. Sátin salsa joba 2024 jylǵy 1 qańtardan bastaý alady.
Budan basqa 2023 jylǵy 1 qańtardan bastap Qazaqstanda 600 myńǵa jýyq azamattyq qyzmetshiniń jekelegen sanattarynyń jalaqysyn jyl saiyn orta eseppen 20%-ǵa kezeń-kezeńmen kóterý úrdisi jalǵasyn tapty. Sondai-aq, 1 qańtardan bastap respýblikalyq biýdjetten tólenetin barlyq járdemaqynyń mólsheri 8,5%-ǵa kóbeise, elimizde yntymaqty zeinetaqy 10,5%-ǵa óskenin de aita ketýimiz kerek.
Al otbasynyń tsifrlyq kartasy aiasynda tabysy kedeilik sheginen tómen otbasylarǵa proaktivti túrde áleýmettik qoldaý taǵaiyndaý engizildi. 1 jeltoqsandaǵy jaǵdai boiynsha ataýly áleýmettik kómek 113,6 myń otbasynan 595,7 myń adamǵa taǵaiyndaldy.
