Bul týraly aqyn "Sókken áńgime" baǵdarlamasyna bergen suhbatynda aitty dep habarlaidy Dalanews.kz.
"Atqa mingen qazaq atasyn tanymaidy deidi. Biz óte batyr halyqpyz, biz qany boiynda oinaǵan kóshege shyqsa jaryp ótetin, tilip ótetin qasietke ie batyr eldiń urpaǵymyz. Sondyqtan biz salqynqandy 100 jyldan beri qarai Ata zańmen ómir súrip kele jatqan, endi qalyptasyp jatqan, qundylyqtaryna endi oralyp jatqan halyqpyz.
Qazaqtyń dástúrli tarihyna qarasań áieldiń, otbasynyń máselesin diplomatiialyq jolmen, kelisim jolymenen dastarqan basynda otyryp sheshken halyqpyz.
Biz kez kelgen máseleni dialog arqyly sheshken halyqpyz. Sol sebepten de basymdyqty soǵan berý kerek dep men árdaiym shyryldaimyn.
Máselen, ár halyqtyń óziniń jaratylys erekshelikteri bar. Máselen, evreilerge bilim berilgen, olar bilim salasynda ozyq júredi. Japondarǵa tán tiianaqtylyq bar. Nemisterge tán dáldik bar. Eýropanyń basqa halyqtaryna tán salqynqandylyq bar.
Olar ásirese myna júieli jumystarda, komandalyq jumystarda óte kóp nátijeler kórsetedi. Sporttyń ózinde de kórinip turady, – deidi Tazabekov.
Onyń pikirinshe shyǵys halyqtary, onyń ishinde qazaq halqy jekpe-jekterde, jeke tulǵanyń erliginde jeńister men nátijelerge kóbirek jetedi. Komandalyq oiyndarda kóbinde aqsap jatady, al kúreske, boksqa, ziltemir kóterýge kelgende alda júremiz.
"Demek, biz júieli, komandalyq sharýalardan góri tulǵaǵa qarap qattyraq boi túzeimiz, tulǵalardy kóbirek tyńdaimyz.
Bizdiń qazirgi problemalarymyzdyń kóbinde sheshilmei jatqandyǵy tulǵalarymyzdyń joqtyǵy.
Bilik pen halyqtyń muńyn ýaqytynda jetkizip, biliktiń betin tez arada halyqtyń jaǵdaiyna buryp otyratyn ziialy qaýymnyń, kórnekti tulǵalardyń joqtyǵynan halyq pen bilik bir-birimen kelispeýshilikke túsip qalyp jatyr", – dep esepteidi aqyn.
Onyń aitýynsha burynyraq halyq pen biliktiń arasyndaǵy daýdy Buqar jyraý, Aqtamberdi, Shalkiiz, Dosmambet sekildi nemese keshegi ataqty Alash qairatkerleri sekildi uly tulǵalar sheship berip otyratyn. Al keńestik kezeń qazaqqa tulǵa tárbieleýge múmkinshilik bermegen.
"Tulǵalar joq bolǵan jetimdiktiń sebebinen bizdiń basymyz qazirgi ýaqytta alańda kezdesip jatyr. Men qazaqtan alańdy qyzǵanbaimyn.
Alań – ol bizdiń alań, balańdy qydyrtyp júrseń, sol jerde qandai da bir ózińniń shat-shadyman kóńil kúiińdi pash etip júrseń, alańda júrgenge ne jetsin!
Al alańda júrip tynyshtyǵyńa alańdap júrseń, onda ol óte qaýipti. Kez kelgen damyǵan elderde olarǵa syrttan yqpal etýshi kúshter joq nemese arandatýshy toptar olarǵa tyrnaǵyn batyra almaidy.
Biz endi-endi el bolyp kele jatqandyqtan, bizdi arandatatyn kúsh te kóp, bizdiń ózimizdiń aramyzda da sol sherýge shyǵýdy durys túsinbeitin adam kóp.
Sondyqtan men qazaqtan alańdy qyzǵanbaimyn, biz arandap qalamyz ba eken dep ýaiymdaimyn.
Alańda turyp beibit sóilesken halyqty bilmeimin qazir óz basym. Mindetti túrde emotsiia bolady, alańda adamnyń sóziniń tony joǵary bolady. Alańda bir-birine degen kózqarasy men júziniń sýyqtyǵy bolady. Sondyqtan ol bilik tarapynan bolsyn, halyq tarapynan bolsyn, mindetti túrde artyq-aýys sózder, áreketter ketedi.
Al oiy aram adam ol jerde politsiia men halyqtyń arasyn ýshyqtyratyn bolsa, ol jerde bilmeisiń ǵoi politsiianyń qany tógile me, halyqqa qiianat jasala ma? Sondyqtan alańǵa shyqqannan bir jaqsy nátijege kepildik bolmaǵandyqtan, alańǵa shyqqandy qoldamaimyn", – deidi Muhamedjan Tazabek.
Ázirlegen Arailym BIMENDIEVA
