Youtube-tegi "Sókken áńgime" arnasyna suhbat bergen aqyn sońǵy kezde óziniń tóńireginde týyndaǵan áńgimeler qoǵamnyń oiynda qordalanyp jatqan sózderdiń syrtqa shyǵýyna sebepker boldy dep sanaidy.
«Halyqtyń oiynda «Rasynda da, Ábiliazov aqiqatty aityp jatyr ma, Muhamedjan biliktiń tapsyrmasyn oryndap jatyr ma» degen siiaqty zańdy suraqtar bar.
Meniń aitqan sózderim bireýdiń tapsyrysy da emes, qandai da bir adamnyń suranysy da emes. Júregimniń qalaýy, erinniń emes, et júregimniń sózi dep aitar edim", – deidi Tazabek.
Onyń aitýynsha zańnyń aldynda bárimiz birdeimiz.
"Ol taqiiasy bar ma, saqaly bar ma, joq pa. Bir aqsaqal bankomat tonap jatatyn bolsa, úndemei qarap turmaimyz ǵoi. Onyń áreketin toqtatýyn talap etemiz. Qandai da bir áje qylmysqa baryp jatatyn bolsa, biz oǵan áje dep qaramaimyz. Biz ony Qazaqstannyń azamaty dep qaraimyz.
Kez kelgen adamnan zańdy talap etýimiz kerek. Ol jas pa, úlken ba, kári ma, ulty, dinnen qaralmaidy. Eger zańdy sherýge shyqqan bolsa, ol adamdardyń kerisinshe qaýipsizdigin saqtaýymyz kerek.
Al zańsyz túrde sherýge shyqqan bolsa, kez kelgen bir arandaýǵa túsip qalmaýy úshin tez arada ol kisilerdiń alańnan aman ketýin qamtamasyz etýimiz kerek. Sonymen birge politsiiaǵa «seniń de bala-shaǵań bar, ákeń bar. Ol jerge kelgen bala jylamaý kerek, ata jylamaý kerek» degendi qulaǵyna quiýymyz qajet", – deidi aqyn.
Suhbat barysynda Tazabek sherýge qarsy ekenin birneshe ret aitty.
"Birinshiden, beibit sherý degendi men kóz aldyma elestete almaimyn. Ol damyǵan elderde bolady. Eger memleketten ruqsat alyp, óziniń oiyn-pikirin aitýǵa ruqsat alyp shyqqan bolsa ondai mitingige eshkim qarsy bolmaidy. Ruqsatsyz mitingige shyqpaǵan durys", – dep esepteidi.
Ázirlegen Arailym BIMENDIEVA
