Youtube-تەگى "سوككەن اڭگىمە" ارناسىنا سۇحبات بەرگەن اقىن سوڭعى كەزدە ءوزىنىڭ توڭىرەگىندە تۋىنداعان اڭگىمەلەر قوعامنىڭ ويىندا قوردالانىپ جاتقان سوزدەردىڭ سىرتقا شىعۋىنا سەبەپكەر بولدى دەپ سانايدى.
«حالىقتىڭ ويىندا «راسىندا دا، ءابىليازوۆ اقيقاتتى ايتىپ جاتىر ما، مۇحامەدجان بيلىكتىڭ تاپسىرماسىن ورىنداپ جاتىر ما» دەگەن سياقتى زاڭدى سۇراقتار بار.
مەنىڭ ايتقان سوزدەرىم بىرەۋدىڭ تاپسىرىسى دا ەمەس، قانداي دا ءبىر ادامنىڭ سۇرانىسى دا ەمەس. جۇرەگىمنىڭ قالاۋى، ەرىننىڭ ەمەس، ەت جۇرەگىمنىڭ ءسوزى دەپ ايتار ەدىم"، – دەيدى تازابەك.
ونىڭ ايتۋىنشا زاڭنىڭ الدىندا ءبارىمىز بىردەيمىز.
"ول تاقياسى بار ما، ساقالى بار ما، جوق پا. ءبىر اقساقال بانكومات توناپ جاتاتىن بولسا، ۇندەمەي قاراپ تۇرمايمىز عوي. ونىڭ ارەكەتىن توقتاتۋىن تالاپ ەتەمىز. قانداي دا ءبىر اجە قىلمىسقا بارىپ جاتاتىن بولسا، ءبىز وعان اجە دەپ قارامايمىز. ءبىز ونى قازاقستاننىڭ ازاماتى دەپ قارايمىز.
كەز كەلگەن ادامنان زاڭدى تالاپ ەتۋىمىز كەرەك. ول جاس پا، ۇلكەن با، كارى ما، ۇلتى، دىننەن قارالمايدى. ەگەر زاڭدى شەرۋگە شىققان بولسا، ول ادامداردىڭ كەرىسىنشە قاۋىپسىزدىگىن ساقتاۋىمىز كەرەك.
ال زاڭسىز تۇردە شەرۋگە شىققان بولسا، كەز كەلگەن ءبىر ارانداۋعا ءتۇسىپ قالماۋى ءۇشىن تەز ارادا ول كىسىلەردىڭ الاڭنان امان كەتۋىن قامتاماسىز ەتۋىمىز كەرەك. سونىمەن بىرگە پوليسياعا «سەنىڭ دە بالا-شاعاڭ بار، اكەڭ بار. ول جەرگە كەلگەن بالا جىلاماۋ كەرەك، اتا جىلاماۋ كەرەك» دەگەندى قۇلاعىنا قۇيۋىمىز قاجەت"، – دەيدى اقىن.
سۇحبات بارىسىندا تازابەك شەرۋگە قارسى ەكەنىن بىرنەشە رەت ايتتى.
"بىرىنشىدەن، بەيبىت شەرۋ دەگەندى مەن كوز الدىما ەلەستەتە المايمىن. ول دامىعان ەلدەردە بولادى. ەگەر مەملەكەتتەن رۇقسات الىپ، ءوزىنىڭ ويىن-پىكىرىن ايتۋعا رۇقسات الىپ شىققان بولسا ونداي ميتينگىگە ەشكىم قارسى بولمايدى. رۇقساتسىز ميتينگىگە شىقپاعان دۇرىس"، – دەپ ەسەپتەيدى.
ازىرلەگەن ارايلىم بيمەندييەۆا
