Qazirgi tańda dinı ekstremızm men radıkaldy ıdeologıanyń aldyn alý jumystary júıeli túrde júrgizilip keledi. Memleket bul baǵytta keshendi sharalar qabyldap, destrýktıvti aǵymdarǵa tosqaýyl qoıýǵa basymdyq berip otyr. Bul týraly Shymkent qalasy Din isteri basqarmasynyń basshysy Bahtıar Ónerbaev aıtyp berdi, dep habarlaıdy Dalanews.kz

«Bizdiń basty maqsatymyz – destrýktıvti dinı aǵym ókilderin dástúrli dinge, qoǵamdyq qundylyqtarǵa beıimdeý jáne olarmen aqparattyq túsindirý jumystaryn úzdiksiz júrgizý», – deıdi basqarma basshysy.

Bahtıar Ónerbaevtyń aıtýynsha, terorızm men ekstremızmge qarsy kúres Qazaqstan zańnamasynda naqty belgilengen. Qylmystyq kodekstiń 256–259 baptarynda radıkaldy ıdeologıany taratý, dinı jáne ultaralyq arazdyq týdyrý sekildi áreketterge jaýapkershilik qarastyrylǵan.

«Shymkent qalasynda osy baptar boıynsha sottalǵan 70-ke jýyq azamat qazir túzetý mekemelerinde otyr. Bul – qoǵamda destrýktıvti ıdeıalarǵa jol joq degenniń naqty dáleli», – deıdi ol.

Qazirgi ýaqytta ınternet – radıkaldy ıdeologıanyń negizgi taralý arnasyna aınalǵan. Osyǵan baılanysty arnaıy monıtorıń júıeleri men kıberbaqylaý quraldary iske qosylǵan.

Sarapshynyń aıtýynsha, jastar ınternettegi ár aqparatqa sene bermeýi kerek. Sebebi áleýmettik jelilerde feık jáne arandatýshylyq mazmundaǵy materıaldar jıi taralady.

Qazaqstanda búgingi tańda 18 konfesıa resmı tirkelgen. Memleket barlyq dinge teń múmkindik beredi, biraq olardyń qyzmeti zań aıasynda qadaǵalanady.

Shymkent qalasynda 9 mısıoner tirkelgen, barlyǵy jyl saıyn qaıta tirkeýden ótedi. Sondaı-aq qalada 32 dinı birlestik bar. Olarmen memlekettik organdar birlesip túrli áleýmettik jáne tárbıelik jobalardy júzege asyrady.

«Biz dinı birlestikterdi memlekettik merekelerge, ekologıalyq aksıalarǵa shaqyramyz. Maqsat – dindi qoǵammen úndestirý, ortaq qundylyqtardy dáripteý», – deıdi basqarma basshysy.

Basqarma jyl saıyn kolejder men ýnıversıtetterge teolog jáne psıholog mamandardy jiberip, din, dástúr jáne radıkalızmniń qaýpi týraly dárister ótkizedi. Bul – jastardyń dinı saýattylyǵyn arttyrýdaǵy mańyzdy baǵyttardyń biri.

Sarapshynyń aıtýynsha, dástúrli din men ulttyq qundylyqtar – qoǵamdy biriktiretin basty negiz. Adasqan aǵymdardyń eń qaýipti tusy – olardyń adamdy otbasynan, ata-anasynan jáne ulttyq sana men dástúrden alystatýy.

«Bizdiń dástúrli dinimiz – ata-anasyna qarsy shyqpaǵan, salt-dástúrin saqtaǵan, qoǵammen birge bolǵan din. Al destrýktıvti aǵymdar, kerisinshe, adamdy bólekteıdi. Sondyqtan biz jastarǵa óz tarıhyn, jeti atasyn, mádenıetin bilýge shaqyramyz», – deıdi ol.

Din isteri basqarmasy basshysynyń pikirinshe, qoǵamnyń qaýipsizdigi – ár azamattyń dinı jáne quqyqtyq saýattylyǵyna tikeleı baılanysty. Eger árkim zańdy, dástúrdi jáne ortaq qundylyqtardy syılasa, radıkaldy ıdeologıaǵa jol jabylady.

«Biz zaıyrly memleketpiz. Biz zań men parasat ústemdik etken el bolýymyz kerek. Sonda ǵana úreı men qorqynysh joq qaýipsiz qoǵam quramyz», – dedi Bahtıar Ónerbaev Áltaıuly.