Qazaqstannyń burynǵy bas kólik prokýrory Maqsat Dúisenov Germaniiadan ekstraditsiialanady. Bul týraly Bas prokýrordyń orynbasary Ǵalymjan Qoigeldiev málimdedi, dep habarlaidy Dalanews.kz.
Onyń aitýynsha, Dúisenovke halyqaralyq izdeý 29 tamyzda jariialanǵan. Al qyrkúiek aiynda ony Germaniianyń quqyq qorǵaý organdary Interpol jelisi boiynsha ustaǵan.
Ǵalymjan Qoigeldiev burynǵy prokýror saiasi baspana surady degen aqparatty joqqa shyǵardy.
"Ekstraditsiialaý protsesi qazirdiń ózinde bastalyp ketti. Germaniia tarapynan bas tartý týraly resmi jaýap túsken joq", – dedi ol.
Eske salaiyq, buǵan deiin Bas prokýratýranyń quqyqtyq statistika jáne arnaiy esepke alý portalynda eks-bas kólik prokýroryna izdeý jariialanǵan edi. Portal dereginshe, izdestirý isi Almaty qalasy Almaly aýdandyq politsiia basqarmasynyń bastamasymen tirkelgen.
