Almaty oblysy Ile aýdanyndaǵy aýyl mektebin jóndeýge 1,5 milliard teńge bólingen. Ákimdik málimetinshe, ǵimarat tolyǵymen qalpyna keltirilip, paidalanýǵa berilgen. Alaida ata-analar men jergilikti turǵyndar mekteptiń qazirgi jai-kúiine narazy. Aitýlarynsha, qomaqty qarjyǵa júrgizilgen jóndeý sapasy kóńil kónshitpeidi, al bólingen qarajattyń qalai jumsalǵany kúmán týdyrady.
Mektepke jóndeý júrgizgen kompaniialar men bólingen qarjy
Resmi derekterge sáikes, sóz bolyp otyrǵan nysan — Ile aýdany M. Túimebaev aýylyndaǵy №20 orta mektep. Munda “tótenshe jaǵdaidyń saldaryn joiý jáne qalpyna keltirý jumystary” jobasy aiasynda qurylys jumystary júrgizilgen.
Jobalyq-smetalyq esep boiynsha, mektepti qaita qalpyna keltirýge jalpy 1,5 milliard teńge bólingen.
Jóndeý jumystaryn “ARCH STROY INVEST” JShS oryndaǵan. Avtorlyq qadaǵalaý qyzmetin “Arlan-joba qurylys”, al tehnikalyq baqylaýdy “KA Lider LTD” kompaniialary atqarǵan. Al tapsyrys berýshi — Ile aýdany ákiminiń apparaty. 2025 jyldyń 12 mamyrynda nysan boiynsha “oń” qorytyndy berilgen.
Ata-analar narazylyǵy
Jóndeý aiaqtaldy degenmen, mekteptiń jaǵdaiy kópshiliktiń kóńilinen shyqpady. Buǵan deiin ata-analar men turǵyndar áleýmettik jelide bilim ordasyndaǵy aqaýlardy kórsetetin beinejazbalar jariialaǵan edi. Kadrlardan sý basqan jertóle, dymqyl qabyrǵalar, ashyq elektr symdary men synǵan terezelerdi baiqaýǵa bolady.
“Jertólede sý jinalyp qalǵan, bul ǵimaratta gidrooqshaýlaý men drenaj júiesiniń durys jasalmaǵanyn kórsetedi. Jylytý júiesi iske qosylmaǵandyqtan, dálizder men synyptar da sýyq. Kei jerlerde terezeler synǵan, al rozetkalar men symdar ashyq tur. Bul - balalar men muǵalimderdiń ómirine úlken qaýip tóndiredi”, — deidi ata-analar.
Sondai-aq kei dálizder men synyptardyń qabyrǵalary jarylyp, tóbelerinen ylǵal izderi baiqalady. Ata-analar bul jaǵdaiǵa qatty alańdaýly ekenderin jetkizdi.
“Mekteptiń mundai kúii balalardyń densaýlyǵyna qaýip tóndirip qana qoimai, biýdjet qarjysynyń maqsatsyz jumsalǵanyn jáne jaýapty organdardyń baqylaýynyń álsizdigin kórsetedi”, — deidi ata-analar.
Ákimdik daýly oqiǵaǵa ne deidi?
Dalanews.kz redaktsiiasy atalǵan máselege bailanysty Ile aýdany ákimdiginiń apparatyna resmi saýal joldady.
Ákim apparatynyń basshysy Asqar Sadyqovtyń aitýynsha, nysanda tótenshe jaǵdaidyń saldaryn joiý jáne qalpyna keltirý jumystary júrgizilgen. Biraq nysan tapsyrys berýshi tarapynan áli qabyldanbaǵan. Onyń sózinshe, merdiger uiym anyqtalǵan birqatar kemshilikti óz esebinen joiyp jatyr.
“Atqarylǵan negizgi jumystardyń qatarynda bólshekteý, qazý jáne topyraqty almastyrý, injenerlik jelilerdi (jylý, sýyq sý, jeldetý jáne jaryqtandyrý júieleri) ornatý, beton quiý jáne árleý bar. Sonymen qatar ǵimarattyń qasbeti tolyqtai zamanaýi aliýminii paneldermen qaptaldy”, — dedi Asqar Sadyqov.
Onyń sózinshe, 2025 jylǵy 8 qazannan bastap jylytý maýsymy kezinde jertóleden sý aǵý faktisi anyqtalyp, merdiger kompaniia ol aqaýdy óz kúshimen jáne óz qarajaty esebinen joiýǵa mindettelgen.
“Aqaýly bólshekter aýystyrylyp, jańa shyǵyn ólshegish ornatyldy. Qazir jylytý júiesin qalpyna keltirý jumystary júrip jatyr”, — dep naqtylady ol.
Aitýynsha, mektep ǵimaraty oblys ákiminiń qaýlysymen aýdan balansyna ótkizilgen, sebebi ol tótenshe jaǵdai kezinde zardap shekken.
“Tótenshe jaǵdaidyń saldaryn joiý boiynsha barlyq jumys tolyq kólemde atqaryldy. Ǵimarattyń birinshi qabatynda seismokúsheitý jumystary júrgizildi, barlyq qajetti qujattar men saraptamalyq qorytyndylar bar”, — dedi ákimdik ókili.
Boi kótergenine 10 jyl ǵana ótken mektep qalaisha apatty jaǵdaiǵa tap bolǵany ekinshi máselege ainalyp ketti. Al basty nazarda - jóndeý jumystaryna 1,5 milliard teńge bólingeni. 900 oryndyq mektep - aimaqtaǵy mańyzdy bilim oshaǵy. Al balalardyń apatty mektepte bilim alýy shendiler úshin qalypty jaǵdai siiaqty. Aýdandyq apparat basshysy Asqar Sadyqov myrza jóndeý jumystary boiynsha merdiger anyqtaý konkýrsy qalai ótkenin, nelikten tym qomaqty qarjy bólingenin jáne jóndeýden keiingi mekteptiń qalaisha halyq narazylyǵyn týdyrǵanyna jarytyp jaýap bermedi. Ile aýdanynyń qazirgi ákimi Qaiyrjan Serikbaiuly bir jyl burynǵy jaǵdaiǵa qanyq bolmaýy múmkin. Sebebi aýdanǵa ákim bolǵanyna jyl tolmady. Dese de jóndeý jumystaryna 1,5 milliard teńge bólingen mektepti shý shyǵarmai baqylaýǵa shamasy jetpegendei...
