AQSh prezidenti Donald Tramp pen Qytai tóraǵasy Si Tszinpinniń Ońtústik Koreianyń Pýsan qalasynda ótken kezdesýi bir saǵat qyryq minýtqa sozyldy. Álem nazar aýdarǵan kelissózder jabyq formatta, Ońtústik Koreia ÁÁK áýe bazasynda ótti.
Kezdesýdiń basynda qos el basshylary eki eldiń týlarymen bezendirilgen zalda bir-birin qarsy aldy. Tramp Sidi “eski dosym” dep atap, “uly eldiń uly basshysymen qatar bolý — men úshin úlken qurmet” dedi.
«Biz kóptegen máseleler boiynsha kelisimge keldik, taǵy birnesheýin dál qazir talqylap jatyrmyz», – dedi Tramp.
Al Si Tszinpin óz kezeginde AQSh pen Qytai arasyndaǵy qarym-qatynastardyń “jalpy alǵanda turaqty bolǵanyn” atap ótti. Onyń aitýynsha, eki el “ortaq kóshbasshylyq aiasynda durys baǵytty saqtap qala alady”.
Negizgi taqyryptar: saýda, iadrolyq qaýipsizdik, turaqtylyq
Kelissózder Pýsan qalasynyń mańyndaǵy Kimhe áýejaiy janyndaǵy baza aýmaǵynda ótti. AQSh delegatsiiasy quramynda memlekettik hatshy Marko Rýbio, qarjy ministri Skott Bessent jáne saýda ókili Djeimison Grir boldy.
Resmi málimetter jariialanbaǵanymen, derekkózderdiń habarlaýynsha, taraptar saýda qatynastary, iadrolyq qaýipsizdik jáne aimaqtyq turaqtylyq máselelerin talqylaǵan.
Sarapshylardyń pikirinshe, bul kezdesý jaqynda Malaiziiada ótken eki el delegatsiialary arasyndaǵy saýda bitimin rastaý sipatynda ótken.
Tramptyń iadrolyq synaqtarǵa qatysty málimdemesi
Pýsanǵa sapar aldynda Donald Tramp AQSh Qorǵanys ministrligine iadrolyq qarý synaqtaryn dereý qaita bastaýǵa buiryq bergenin jariialaǵan bolatyn.
«Basqa elderdiń synaq baǵdarlamalaryna bailanysty men bizdiń iadrolyq qarýlarymyzdy teń jaǵdailarda synaýdy bastaýdy tapsyrdym», – dep jazdy Tramp Truth Social jelisinde.
Bul málimdeme Simen kezdesýge birneshe saǵat qalǵanda jasalyp, sarapshylar pikirinshe, kelissózderge belgili bir shielenis engizgen.
Sarapshylar pikiri
Halyqaralyq daǵdarys tobynyń aǵa keńesshisi Ali Ýainnyń aitýynsha, kezdesýden “úlken tosyn jańalyqtar kútýge negiz bolmaǵan”.
«Eń basty nátije - dialogtyń ózi. AQSh pen Qytai bir-biriniń ekonomikasyna ziian tigize alatynyn kórsetti, endi sol ózara táýeldilikti tejeý quralyna ainaldyrý mańyzdy», – dedi ol.
Kezdesý qorytyndysy
Shamamen bir jarym saǵattan astam jalǵasqan kelissózden keiin eki kóshbasshy ortaq málimdeme jasamastan zaldan shyqty. Tramp kóp uzamai Air Force One ushaǵyna minip, elge oraldy.
