Jasyryn qaýip: gaz jarylysynan qalai saqtanamyz?

28 qazan kúni tańerteń Aqtaýdaǵy «Ásiia» turǵyn úi kesheniniń jertólesinde gaz ballony jaryldy. Mamandardyń aitýynsha, jarylystyń sebebi – turmystyq gaz ballonyn qoldaný kezindegi qaýipsizdik erejelerin buzý bolýy múmkin.Turmystyq gaz balony nelikten jarylady jáne qalai onyń aldyn alamyz? Tolyǵyraq Dalanews.kz materialynda.

Tótenshe jaǵdailar ministrliginiń túsindirýinshe, turmystyq gaz jarylysy tehnogendik sipattaǵy tótenshe jaǵdaiǵa jatady. Mundai jaǵdai kezinde adam ómiri men densaýlyǵyna qater tónedi, turǵyn úiler men múlik zaqymdanady.

QR TJM ókilderi gaz jarylystarynyń kópshiligi bir sebepke – qaýipsizdik talaptarynyń saqtalmaýyna bailanysty oryn alatynyn aitady. Ásirese, jertóle men balkonda gaz ballondaryn saqtaý, jóndeý jumystaryn óz betinshe júrgizý, jaramsyz shlangiler men eski plitalardy paidalaný – jii kezdesetin qatelikter.

Mamandar eskertedi: gazben abai bolyńyz!

QR TJM turǵyndarǵa kelesi qaýipsizdik erejelerin qatań saqtaýdy usynady:

1. Gaz ballondaryn úi ishinde, ásirese jertóle men balkonda saqtaýǵa bolmaidy. Ballondy tek arnaiy jeldetiletin bólmede nemese syrttaǵy qoimada ustaý qajet.

2. Gaz jabdyqtaryn óz betińizshe ornatpańyz jáne jóndemeńiz. Bul jumysty tek arnaiy ruqsaty bar mamandar oryndaýy tiis.

3. Ventiliatsiia men tútin shyǵarý júiesin únemi tekserip otyryńyz. Gaz iisi shyqqan jaǵdaida aqaýdy jasyrýǵa tyryspańyz — saldary óte aýyr bolýy múmkin.

4. Gaz plitasyn jylytý úshin paidalanýǵa bolmaidy. Ashyq ot ottegini jutyp, bólmede kómirqyshqyl gazynyń jinalýyna sebep bolady.

5. Balalar men qart adamdarǵa túsindirý mańyzdy. Kóptegen tótenshe jaǵdai nemqurailyq pen turmystyq ádetterden týyndaidy.

Gazdyń iisin sezseńiz,ne isteý kerek?

• birden tereze men esikti ashyp, bólmeni jeldetý;

• gazdyń shyǵý kózin tabý jáne krandy jabý;

• elektr quraldaryn qospaý, uialy telefon qoldanbaý;

• kórshilerge eskertý jáne turǵyndardy qaýipsiz jerge shyǵarý;

• 112 nómirine qońyraý shalý;

• eger aqaý ballonnan shyqsa, mokraia shúberekpen jaýyp, abailap syrtqa shyǵarý.

Qaýipsizdiktiń basty kepili – gaz qyzmeti mamandarynyń páterlerge kirýine múmkindik berý

Qalalyq gaz qyzmeti mamandary josparly túrde páterlerge kirip, jabdyqtardy tekserip turady. Bul qaýipsizdiktiń basty sharty. Eger turǵyndar olardy úige kirgizbese, olar óz ómirin ǵana emes, búkil úi turǵyndarynyń ómirin qaterge tigedi.

Alaida kei adamdar tekserýshilerdi úige kirgizýge qorqyp jatady, sebebi mamandardyń ornyna alaiaqtar kelip qalýy múmkin degen qaýip bar. Mundai jaǵdaidyń aldyn alý úshin tómendegi keńesterge nazar aýdaryńyz:

1. Aldymen qyzmet kórsetýshi uiymǵa qońyraý shalyńyz. Onyń bailanys nómirleri kommýnaldyq túbirtekte kórsetiledi.

2. Esikti ashpas buryn tekserýshiniń qyzmettik kýáligin tekserińiz.

3. Turǵyndar tizimimen (aty-jóni, mekenjaiy) tanysyńyz. Josparly tekseris kezinde kommýnaldyq qyzmet ókilderi ádette búkil úidi nemese kósheni aralaidy.

4. Úige bir ǵana tekserýshini kirgizińiz.

5. Mamannyń áreketterin baqylańyz, ony bólmede jalǵyz qaldyrmańyz.

6. Buzýshylyq anyqtalsa, mindetti túrde akt toltyrýdy talap etińiz.

7. Eshqashan aldyn ala aqsha bermeńiz jáne túbirteksiz tólem jasamańyz.

Turmystyq gaz jarylǵan jaǵdaida ne isteý kerek?

1. Múmkindik bolsa, elektr energiiasyn, sýdy jáne gazdy óshirip, terezelerdi ashyńyz.

2. Dereý dalaǵa shyǵyńyz.

3. Gaz qyzmetine, órt sóndirý jáne qutqarý qyzmetterine habarlasyńyz. Eń ońaiy — birińǵai qutqarý nómiri «112»-ge qońyraý shalý.

4. Ainalańyzǵa qarańyz: múmkin, kómekke muqtaj adamdar bar shyǵar.

5. Dalaǵa shyqqan soń, jarylys bolǵan ǵimarattan alysqa ketip, qurylystyń búlingen bólikterinen abai bolyńyz. Úidiń tireýish qurylymdary zaqymdanǵan bolsa, qasynda turý qaýipti.

6. Eger syrtqa shyǵý múmkin bolmasa, eń qaýipsiz jerdi taýyp, qutqarýshylar kelgenshe kútińiz.

Aqtaýdaǵy oqiǵa — barlyǵymyzǵa eskertý. Ádemi interer nemese yńǵailylyq úshin qaýipsizdik erejelerin elemeý qaiǵyly jaǵdaiǵa ákelýi múmkin. Gazǵa salǵyrt qaramańyz — ol tek qana qyzmet etýi tiis, qaýip tóndirmeýi kerek.

Eske salaiyq, Aqtaýdaǵy oqiǵa ornyna 11 qutqarýshy men tórt tehnika jumyldyryldy. Jarylys saldarynan bes adam zardap shekti, onyń ekeýi — 2010 jáne 2015 jyly týǵan balalar. Zardap shekkender aýrýhanaǵa jetkizildi.