Osy jazda meniń bala kezdegi armanym oryndaldy. QHR-nyń Qazaqstandaǵy bas Konsýldyǵynyń jáne kıeli oqý ordasy ál-Farabı atyndaǵy QazUÝ-niń seriktestik jumysy nátıjesinde biz, qazaqstandyq qytaı tilin úırenýshi stýdentter Qytaıǵa jazǵy lagerge attandyq. Qýanyshymyzda shek bolmaı, tóbemiz qýanyshtan kókke jetti. Qujat pen vıza formaldilikterin rásimdeý sharalarymen aınalysyp júrip, Qytaıǵa ushar kúnniń jetkenin baıqamaı qaldym. Boıymdy túsiniksiz sezimder bılep aldy. Bir jaǵynan armanymnyń azdan soń oryndalatynyna qatty qýansam, ekinshi bir jaǵynan otanymdy, týǵan-týystarymdy qımastyq sezimi paıda boldy. Osyndaı sezimmen áýe kóligine kóterildim. Birneshe saǵat ótken soń, mejeli orynǵa Beıjińge kelip jettik. Beıjiń - Qytaıǵa saıahatymnyń alǵashqy aıaldamasy bolǵan soń, men úshin óte ystyq qala, jadymda máńgi óshpes iz qaldyrdy. Beıjiń - Qytaıdyń astanasy bolyp qana qoımaı, tarıhı jáne mádenı ortalyǵy bolyp tabylady. Beıjiń kóshelerinde Qytaıdyń tarıhy men mádenıeti jóninde syr shertetin jádigerler men zamanaýı qurylystar keremet úılesimdilikte jatyr. Astanalyq ómirmen jete tanysyp, úlken áser alǵan biz, endi Qytaıdyń ekonomıkalyq ortalyǵy - Shanhaı qalasyna jol tarttyq. Shanhaı - Qytaıdyń asyl marjany, óte tez qarqynmen damyp kele jatqan ekonomıka jáne saýda ortalyǵy bolyp tabylady. Tipti, Qytaıdyń Nú-Iorki dep aıtsaq, artyq aıtpaımyz. Túngi qala kórinisteri tamasha, kóshe boıy jaryq shamdar, tipti qurylystardyń qabyrǵalary da úlken teledıdar ekrandaryna aınalǵan. Aspandaǵy juldyzdarǵa qaramasań, tipti mezgildiń tún ekenin umytyp ta ketesiń. Rasymen de, Shanhaı joǵary deńgeıde damyǵan, bolashaǵynan zor úmit kúttiretin qala, aldaǵy eki-úsh jylda álemniń mańyzdy ekonomıkalyq ortalyǵyna aınalary sózsiz. Saparymyzdyń kelesi beketi - Chındao qalasy. Chındao Qytaıdyń týrıstik qalasy, bul qalaǵa álemniń túkpir túkpirinen, sonymen qosa Qytaıdyń ózge de aýdandarynan týrıster aǵylyp keledi.
Basty sebep - Sary teńiz sýyna shomylý, jaǵajaıda demalý. Bizdiń de basty maqsatymyz sol edi. Chındaoǵa kele sala, Sary teńiz jaǵalaýyna bettedik. Keıin, teńiz taǵamdarymen tamaqtandyq. Ashyq teńizden jyraqta turatyn bizge Chındao taǵamdary ekzotıkalyq bolyp kórindi, alaıda óte dámdi, ári paıdaly. Osylaısha, bizdiń Qytaıǵa saıahatymyz aıaqtaldy. Bul sapardan alǵan tájirıbemiz ben túıgen oılarymyz bolashaqta mańyzdy ról atqarary aıtpasa da túsinikti. Alaıda, bastysy qytaı tilin úırenýshi bizderge bul sapar bilimimizdi jetildirip, qazaq-qytaı qarym-qatynasyn nyǵaıtý salasynda aıanbaı eńbek atqarýǵa túrtki bolary sózsiz. Osy sapardy uıymdastyrýshy QHR Qazaqstandaǵy Bas Konsýldyǵyna, saparǵa barýǵa múmkindik bergen kıeli shańyraǵymyz ál - Farabı atyndaǵy QazUÝ-yma jáne Shyǵystaný fakúlteti men qytaı tilin úıretken ustazdaryma úlken alǵys bildiremin!
Sartova A., QazUÝ, Shyǵystaný fakúltetiniń stýdenti
Sharypqazy N., QazUÝ, Shyǵystaný fakúltetiniń oqytýshysy
