Memleket basshysy Qaýipsizdik keńesiniń kiberqaýipsizdik jónindegi otyrysyn ótkizdi,- dep habarlaidy Dalanews.kz.
Qasym-Jomart Toqaevtyń tóraǵalyǵymen kiberqaýipsizdikti qamtamasyz etý jáne azamattarǵa arnalǵan tsifrlyq ortany qorǵaý máseleleri jóninde Qazaqstan Respýblikasy Qaýipsizdik Keńesiniń otyrysy ótti.
Memleket basshysy jýyrdaǵy Joldaýynda Qazaqstandy tolyq tsifrlyq memleketke ainaldyrýdy kózdeitin mindet júktegenin aitty. Bul úshin keshendi shara qabyldaý, sonyń ishinde kiberqaýipsizdik salasynda da aýqymdy jumys atqarý qajet.
Jiyn barysynda qazirgi zamanǵy kiberqaterler men oǵan qarsy is-qimyl ádisteri, asa mańyzdy aqparattyq infraqurylymdy qorǵaý, kiberqaýipsizdik indýstriiasyn damytý jáne kadr daiarlaý júiesin jetildirý máseleleri talqylandy.
Keńeste Tsifrlyq damý, innovatsiialar jáne aeroǵarysh ónerkásibi ministri Jaslan Mádiev pen Ulttyq qaýipsizdik komitetiniń tóraǵasy Ermek Saǵymbaev baiandama jasady.
Prezident kiberqylmyspen, sonyń ishinde kiberalaiaqtyqpen kúrestiń mańyzyna toqtaldy. Sonymen qatar, kiberqylmystardy tergeýge qatysatyn memlekettik organdardyń quzyretin arttyrý sharalaryna basa nazar aýdardy.
Budan bólek, Qasym-Jomart Toqaev azamattardyń jeke derekterin qorǵaýdy jáne derbes málimetterdi taratqany úshin beriletin jazany kúsheitýdi basty mindet retinde atady. Sondai-aq, kiberortadaǵy qaýipsizdik pen jaýapty áreket qaǵidattaryn halyqqa keńinen túsindirip, aldyn alý jumystaryn kúsheitý qajet.
Otyrys sońynda Memleket basshysy strategiialyq táýekelderdi azaityp, kiberqaýipsizdik máselelerin júieli túrde sheshý maqsatynda birqatar shara qabyldaýdy tapsyrdy.
