Qorǵanys ministri qaza tapqan áskeri qyzmetshilerdiń otbasylarymen kezdesti, dep habarlaidy dalanews.kz.
Mańǵystaý oblysynda qorǵanys ministri, aviatsiia general-leitenanty Dáýren Qosanov oqý-jattyǵý barysynda qaza tapqan áskeri qyzmetshilerdiń otbasylaryna bardy.
Ministr qaza tapqandardyń týǵan-týystary men jaqyndaryna kóńil aitty. Ol orny tolmas qazaǵa bailanysty otbasylardyń qaiǵysyna ortaq ekenin jetkizdi.
"Qurmetti ata-analary, týysqandary! Men qorǵanys ministrimin. Basymdy iip, sizderdiń aldaryńyzǵa kóńil bildireiin dep keldim. Qaiǵy sizderdiki ǵana emes, kúlli qazaq eliniń qaiǵysy. Keshirińizder... Balalaryńyz úshin sabyr saqtańyzdar. Qaza tapqan azamattarymyzdyń jatqan jeri jánnatta bolsyn. Barlyq kináli adam jazaǵa tartylady, sony bilińizder", – dedi Dáýren Qosanov.
Ministr jaqyndarynan aiyrylǵan otbasylardyń qaiǵysyn eshbir sózben jeńildetý múmkin emes ekenin atap ótti.
"Olar biz úshin jai ǵana áskeri qyzmetshiler emes, bizdiń uldarymyz,baýyrlarymyz. Olardyń qazasy – barsha Qarýly kúshter úshin orny tolmas aýyr qaza. Biz týǵan-týystary men jaqyndarynyń qaiǵysyna ortaqtasyp, osy qiyn kezeńde olarmen birge bolamyz", – dedi qorǵanys ministri.
Meirambek Berdihanov, Azamat Mádihan jáne Dastan Begei Jańaózen qalasynan, Miras Turdybekuly Jetibai aýylynan merzimdi áskeri qyzmetke shaqyrylǵan bolatyn.
