Túrkistan oblysynda týberkýlezge qarsy kúrestiń nátijesinde sońǵy 10 jylda bul dertpen tirkelgen naýqastardyń sany 52,2 paiyzǵa azaidy. Osyǵan bailanysty 2015-2025 jyldar aralyǵynda tósek qory 740-tan 250-ge deiin, iaǵni 66,2 paiyzǵa qysqartyldy. Bul týraly oblys ákiminiń tóraǵalyǵymen ótken májiliste aityldy,- dep habarlaidy Dalanews.kz
Oblys ákimi Nuralhan Kósherov Memleket basshysy Qasym-Jomart Toqaevtyń tapsyrmasyna sáikes, halyq densaýlyǵyn saqtaý – eń basty basymdyqtyń biri ekenin aityp, tiisti sala basshylaryna naqty tapsyrmalar berdi.
– Týberkýlezge qarsy kúresti kúsheitýdi tapsyramyn. Naýqastardy erte anyqtaý, zamanaýi emdeý ádisterin qoldaný jáne profilaktikalyq sharalardy keńeitý arqyly indettiń taralýyna tosqaýyl qoiýymyz kerek. Meditsina qyzmetkerleriniń biliktiligin arttyryp, halyq arasynda aqparattandyrý jumystaryn jandandyrý qajet, – dedi oblys ákimi.
Túrkistan oblysynyń densaýlyq saqtaý basqarmasynyń basshysy Ashan Baidýáliev týberkýlezge qarsy atqarylyp jatqan jumystar boiynsha baiandama jasady. Onyń aitýynsha, 2025 jyldyń 8 aidyń qorytyndysy boiynsha Túrkistan oblysynda týberkýlezden aýrýshańdyq kórsetkishi 9,7%-ǵa tómendep, 100 myń turǵynǵa shaqqanda 18,5-ten 16,7-ge azaidy. Bul kórsetkish respýblika boiynsha 23,6-dan 20,7-ge, iaǵni 12,3%-ǵa tómendegen. Balalar arasyndaǵy jaǵdai da jaqsaryp keledi. Jalpy 2016 jyldan bastap týberkýlezge qarsy jańa preparattarmen emdeý júrgizilip keledi. 2020 jyldan bastap qysqa merzimdi shema boiynsha emge 355 naýqas iriktelip, onyń búgingi tańda 320-sy emin sátti aiaqtap otyr. 2025 jyldyń mamyr aiynan bastap BPal shemasy boiynsha em bastalyp, 17 naýqas iriktelip emdelýde.
Bul jańa shemalar óz kezeginde naýqastardyń emdelý merziminiń qysqarýyna alyp keledi, iaǵni 18-24 aidan 6-12 aiǵa deiin jáne áleýmettik-ekonomikalyq turǵydan da tiimdi bolyp tabylady.
2018 jyldan bastap ftiziatr, bakteriolog, orta jáne kishi býyn qyzmetkerleri emhana júiesine shtattyq birlikpen berildi. Al týberkýlezben aýyratyn naýqastardyń azaiýyna orai «Balyqshy» shipajaiy 2020 jyly reformalanyp, somatikalyq aýrýlarǵa arnalyp beiini ózgertildi. Týberkýlezden keiingi ońaltý bólimi ortalyqtyń bazasynda ashyldy.
Túrkistan oblysynyń ftiziatriialyq qyzmetin jańǵyrtýdyń 2025-2026 jyldarǵa arnalǵan Sheberlik josparyna sáikes, 2025 jyldyń qorytyndysymen 70 tósek oryndy qysqartý kózdelse, al 2030 jylǵa qarai týberkýlezge qarsy 90 tósek-oryn qaldyrý josparlanǵan.
Sonymen qatar oblys boiynsha áleýmettik qoldaýǵa qarjy qaralǵan. Túrkistan oblysy boiynsha ambýlatoriialyq kezeńde emdelip júrgen naýqastardyń taǵaiyndalǵan em tártibin úzbeýine yntalandyrý maqsatynda turaqty túrde ai saiyn 10-15AEK kóleminde áleýmettik kómek berilýde. Jergilikti biýdjetten 2025 jyldyń 8 aiynda 553 naýqasqa 125 590 748 teńge qarajat bólingen. Týberkýlezge bólingen jalpy qarajatqa eseptegende úles salmaǵy 7,6 paiyzdy qurady.
