Nazarbaevtar áýletine jaqyn dintanýshy ári qoǵam qairatkeri Beibit Saparaly burynǵy prezidenttiń týystaryna qatysty renishin aitty, dep dalanews.kz tilshisi kznews.kz saityna silteme jasap habarlaidy.
Ol bul týraly 2025 jyly "Sadaq" media agenttiginiń "Dúrbi" jobasyna bergen suhbatynda aitqan edi.
Beibit Saparalynyń sózinshe, Nursultan Nazarbaev 2014-2015 jyldardan bastap jaqyndaryna birneshe ret eskertý jasaǵan. Ol burynǵy prezidenttiń týystaryna qatysty keibir áreketterine kóńili tolmaǵanyn jetkizdi.
"Nursultan Nazarbaev óziniń ainalasyna, týystaryna 2014-2015 jyldan bastap: "Eshteńege aralaspańdar, eshteńege barmańdar, bireýdiń bir nársesin tartyp almańdar, álimjettik jasamańdar. Bizdiń ataǵymyzdy paidalanyp, bir nárse istemeńder" dep qatty aita bastady. Mynaý COVID-ten keiin biraz ýaqyt ótti ǵoi. Bolat Nazarbaevtyń áieli qaitys boldy. Basqa nárseler boldy. Bókeńniń ózi ol kezde aýyryp júrdi. Sol kezde kýá bolǵandardan bir estigenim… Ol jerde Elbasynyń ózi bolǵan. Inisi Bolat, qaryndasy Ánipa, sosyn Samat bolǵan. Qairat Satybaldy ol kezde túrmede edi. Sol kezde ol kisi (Nursultan Nazarbaev – red.) qatty ókpelep, ishte jinalyp qalǵan renishin aitty dep estidim. "Sender mynadai nárseni búittińder, myna jerde osyndai aqaý jiberdińder. Maǵan sóz keltirip jatsyńdar. Maǵan jaqsylyq jasaýdyń ornyna, sóz keltirip jatsyńdar. Men qansha ret eskerttim?" dep, ol kisi qatty-qatty ashýlanǵan eken", – dedi Beibit Saparaly.
