«Qazaqmys» kompaniialar tobynyń kásiporyndarynda eńbek jaǵdaiyn jáne jumysshylarǵa arnalǵan turmystyq infraqurylymdy jaqsartý jumystary jalǵasýda. Sonyń bir baǵyty — kásiporyndardyń óndiristik jáne ákimshilik-turmystyq keshenderindegi kiim iletin shkaftardy kezeń-kezeńimen jańartý, dep habarlaidy dalanews.kz.
Jańa shkaftar óndiris oryndaryndaǵy kiim aýystyratyn bólmelerge ornatylyp jatyr. Olar jumysshylardyń arnaiy kiimderi men jeke zattaryn yńǵaily saqtaýǵa arnalǵan. Konstrýktsiialar beriktigimen jáne paidalanýǵa qolailylyǵymen erekshelenedi. Sondai-aq gigiena, jeldetý jáne zattardy saqtaý qaýipsizdigi máselelerine erekshe nazar aýdarylǵan.
Jańartý baǵdarlamasy aiasynda Jylandy kenishinde 200 jańa shkaf, Jomart kenishinde taǵy 300 shkaf ornatý josparlanǵan. Jalpy kompaniia kásiporyndary boiynsha 6900-ge jýyq shkaf qoiylady. Jumystar túrli óndiristik nysandarda, eń aldymen — qyzmetkerler sany kóp jáne óndiris tsikli qarqyndy bólimshelerde kezeń-kezeńimen júrgizilýde. Jabdyqtardy jetkizý jáne ornatý jumystary osy jyldyń shilde aiyna deiin tolyq aiaqtalady.
Jańartý jumystary qyzmetkerler úshin qolaily jumys ortasyn qalyptastyrý boiynsha kompaniianyń júieli jumysy aiasynda júzege asyrylýda. Turmystyq jaǵdaidy jaqsartý — kompaniianyń áleýmettik saiasatynyń mańyzdy bóligi jáne kásiporyndardaǵy óndiristik mádenietti arttyrýdyń negizgi faktorlarynyń biri.
Kompaniia ókilderi atap ótkendei, jumysshylarǵa qolaily jaǵdai jasaý ónerkásiptik qaýipsizdik, óndiristi modernizatsiialaý jáne zamanaýi tehnologiialardy engizý máselelerimen qatar basym baǵyt bolyp qala beredi.
